Sarah-Quita ta embarca riba un biahe largo di no menos cu 24 ora di buelo pa yega Zuid Korea via Amsterdam, Istanbul, Seoul, Busan, Ulsan y finalmente ta yega Jinha Beach den parti zuid di Zuid Korea.
Na Zuid Korea ta unda e prome competencia pa e temporada di windsurf ta inicia y ta dura di 2-8 di Mei.
Ya durante 5 dia biento ta hopi debil cu ta causa cu e competencia ta para.
Diasabra anochi sin embargo Sarah-Quita ta ser spierta pa su ruman desde Aruba cu ta informe cu biento ta bay supla ariba e penultimo dia cu ta diadomingo. Mirando cu tin un diferencia di 13 ora cu Aruba via windguru ta check si tin biento pa diadomingo, mientras cu Sarah-Quita ta drumi. Grandi tabata SQ su sorpresa cu e noticia cu biento a lanta y e competencia posiblemente por tuma luga.
Sarah-Quita ta delibera via facetime cu Quincy relaciona cu e ekipo mas favorabel pa usa durante su manga.
E area di Jinha Beach tin su retonan di biento, ola, wier y desperdicio cu ta drief den e awa.
Sarah-Quita ta pasa di e eliminacion clasificatorio pa e promer eliminacion final. Mirando cu den curso di e añanan e regatistanan femenino a mehora enormemente , Sarah-Quita ta conciente cu tur cos ta depende di un salida kerpi.
Exactamente su timing na perfeccion ta haci cu e ta crusa e liña como prome y su contrincante Lena Erdil ta pega manera un cleconchi riba dje. Sinembargo SQ ta yega prome na e boei y ta logra lora y sali y gara biento limpi. E ta acelera, crea suficiente distancia pa sigui maniobra rond otro boeinan y canta victoria. Asina e penultimo dia di competencia di windsurf ta trece victoria pa Aruba na Zuid Korea. Su paisano Ethan Westera kende ta campeon hubenil di slalom tambe a haci un bon papel. Visiblemente Ethan tin hopi velocidad y ta bira dolor di cabes pa hopi di e grandinan. E siguiente competencia ta tuma luga na Yokosuka, Hapon dia 11-16 di Mei venidero. Ban apoya nos regatistanan Arubiano den nan afan pa demostra cu “Aruba tin aden”.