Durante patruyahe di Warda Costa e barco di Defensa den area di Caribe, Zr. Ms. Van Amstel, dialuna den oranan trempan di mainta a sali brinda ayudo na un barco di carga Venezolano.
Tabata mas o menos 4 or y 30 di mainta, cu e fragata di Marina Hulandes a ricibi un mensahe di e Centro di Rescate y Coordinacion di Warda Costa. Un barco chikito di carga tabata tin dos dia caba tabata drief den e area noord di Bonaire. E barco a sali for di Aruba, direccion Antigua ora cu nan a haya nan mes cu problemanan di propulsion. Door di e stroom y e biento, nan a sigui drief den direccion di costa di Bonaire, pero esaki tabata un peliger ya cu chance tabata grandi cu e barco lo a pega den e barancanan.
E barco naviero Hulandes a sali cu velocidad halto na e locacion di e barco Venezolano. Na nan yegada e personal technico di Zr. Ms. Van Amstel a baha bay brinda asistencia na e barco aki. Ora cu a keda constata cu e problema di e barco no por a wordo soluciona eynan, a dicidi di touw e barco aki. Den cooperacion cu e boardingteam di Warda Costa y e Servicio Nautico di Van Amstel, a logra touw e barco aki. Den oranan trempan di anochi, e barco a wordo pasa pa un servicio di touwing particular y a wordo hiba pa e waf di Kralendijk. E ayudo a wordo masha aprecia door di e tripulacion Venezolano.