Aruba Softball Bond trahando duro riba nos talentonan hoben recientemente a manda un seleccion U18 competi na Cartagena Colombia. Despues di algun luna di preparacion pa prome biaha den historia un seleccion nacional di Aruba a sali pa un competencia den e categoria aki. Mester bisa ta un competencia di un nivel hopi halto unda seleccionnan di henter pais ta competi contra otro. Paisnan manera Brasil, Argentina, Mexico y Peru cual tur tabata presente na dicho competencia ta paisnan hopi bon desaroya den e nivel aki. Pitchernan manera anteriormente a splica na e edad aki ta bula caba creando asina extra velocidad y por move nan lansamento hopi bon entre otro raisingball y dropball. Argentina kende tabata uno di e faboritonan pa cu e campeonato aki despues di a adkeri e coach actualmente considera den e top 3 coach di henter Americas, Sr. Luis Perdomo a enfrenta Aruba. Ora cu kisas fanaticonan a pensa cu esaki posiblemente tabata un wega facil Aruba a rally den e prome 2 inningnan y a bay ariba 6-0 riba Argentina riba algun bon bataso di Nikkaela Jacobs cu un doblete cu a baña e leftfield, tambe batasonan oportuno entre otro di Mega Puki Jully-Ann Kock, Jean Carla Maduro, Ilajay Tromp,Yolaisha Ridderstap,Shatienne Kock, Kira y Emileen Kock. Otro hungadonan cu a duna nan aporte tabata Elizabeth Helder, Shadifa Lewis y Chelsea Marchena. E hobencita talento di Aruba Zjaca Kock di apenas 16 aña a lansa fabuloso te den di 5 entrada. Despues Aruba a comete den parti defensa algun eror costoso cu a permiti Argentina bin bek den wega y ta empata e wega den di 5 inning. Den 6 inning Argentina ta rally y asina gana e wega 11-7. Aruba a mustra den corto tempo di por competi contra e grandinan den e categoria aki. Ta cuestion di tene e atletanan hunto y keda practica. Esaki ta exactamente locual Aruba Softball Bond a planea y desde diaranson awor 2 di November te diaranson 14 di December training lo continua na Pos Chikito. Despues lo re-anuda training 11 di Januari 2017. Adhunto algun bunita potret di nos seleccion super hoben U18 cu atletanan entre 14 y 18 aña. Trahando duro nos lo yega. Softball den pleno desaroyo.