Den fin di siman a tuma lugar e World Junior Championship na Burnaby, Canada y Aruba tabata tin solamente dos participante. Jourdé Klabér kende a bringa den e categoria di -59 kilo y Záhyon Klabér kende a bringa den e categoria di -63 kilo. Ambos atleta a bringa diabierna durante di dia. Ex campeon mundial Henk Meijer a bin for di Hulanda pa asina trainnan pa un siman ariba tactica y despues a biaha hunto cu nan te na Canada. Jourdé Klabér tabata e prome cu a bringa. Jourdé Klabér a sali contra di Nenad Marjanov di Serbia y despues di 3 rond cada uno di 1 minuut y mey por a bisa cu el a haci tur cos den su alcance, pero mester a keda contento cu su derota di 2-1.
Záhyon Klabér a sali contra di Jorge Hernandez di Puerto Rico. Záhyon Klabér a haci tur cos posibel pa por a logra gana, pero e bataya tabata uno cu tabata na fabor di e pianan largo di Jorge Hernandez di Puerto Rico. E la trata di score mas punto ariba Záhyon Klabér pero a logra yega na un total di 4 punto y Záhyon Klabér a logra score 2 punto y Puerto Rico a gana cu un score di 4-2 y a haci cu Puerto Rico a sigui pa e di dos rond. Rumannan Klabér por mira atras ariba un experiencia grandi pa nan na unda cu nan a participa na un Mundial di Taekwondo unda cu 102 pais a participa.
Brazil Taekwondo Stichting kier a gradici tur esnan cu a haci posibel pa e rumannan Klabér por a haya e oportunidad di participa na un Campeonato Mundial y a representa Bandera di Aruba. Nos ta gradici Dr. Guaicaipuro Jimenez di ARTBO, Henk Meijer y e team completo di Brazil Taekwondo Stichting.