Departamento di Higiena a wordo yama pa bay wak Cas di cuido Oasis pa algun cos iregular cu ta pasando eynan. Nan a bay controla riba e higiena di e cushina y e DBZ a bay controla loke ta e carchi di salud. Na momento cu nan a bay controla e parti di higiena, esaki tabata na ordo y e carchinan di salud, esnan cu tabata tey presente, tabata tin nan cu nan, segun Yvette Geerman.
Tin di compronde cu tabata tin hende stranhero trahando, pero na momento cu nan a bay haci inspeccion, nan no a topa cu ningun hende cu no tabata tin nan carchi na e momentonan ey. Segun cu tin di compronde cu tabata tin personal cu tabata traha eynan cu nan no tin full nan papelnan na ordo y cu nan no tabata cumpli cu cierto rekisitonan.
Geerman a sigui splica cu locual ta higiena, limpiesa, tabata na ordo. No tabata tin ningun problema e momentonan eynan y tur cos tabata na ordo. Solamente cu momento cu un di e damanan cu no tabata tin su carchi di salud cun’e, pero si e a verifica cu e tabata tin’e na ordo.
Tur locual cu ta e ramo di thuiszorg, pa pone atencion. Tur esnan cu ta anda cu cuminda, procesa cuminda pa e clientenan cu nan tin, cu ta hende grandi, nan mester tin nan carchi di salud na ordo, tanto pa esnan cu ta traha den cushina y si ta bay sirbi e pashentnan tambe, e carchi di salud mester ta na ordo y mester tin’e vigente. Esey ta conforme ley, segun Geerman.