E aña aki un biaha mas YMCA lo tene su famoso camp pa cual aki Sra. Marina Jones cu ta coordina esaki ta splica mas di e programa di camp cu lo bay tin e aña aki.
YMCA semper ora di camping ta purba di bay un tiki “out of the box”. Tin hopi otro camp cu ta andando na Aruba, den tempo di vakantie. Ta haya hopi sport mas tanto, pero YMCA si ta purba hinca elementonan, no recreativo solamente pero tambe educativo. Ta hinca charlanan den e camping. Ta busca temanan ariba internet out of the box pa nos isla, pa asina e muchanan tin un experiencia otro ora di bin camp di YMCA.
E camp di YMCA ta cuminsa for di e edad di 4 aña, cual ta un Kids Camp, cuminsando for di 4 te cu 11 aña. Durante e ultimo añanan, tabata tin e Teen Camp, cual e aña aki a cambia pa Youth Camp, y pa esaki e edad ta cuminsa na 12 aña. Esaki ta paso cu tin biaha ta haya muchanan di 12 aña den e Kids Camp, pero e diferencia di edad ta mucho grandi. Pero den e Youth Camp, ta desde 12 aña, pero no tin un limite di edad. Pero mas tanto ta haya muchanan te cu maximo 16 aña. E grupo aki YMCA ta purba di laganan haci cosnan mas excitante, ta haci bespreking pa laga e grupo aki haci un sport un poco mas pisa, dus eseynan ta un tanto mas e nivel ta un poco mas halto pa e muchanan di Youth Camp.
Pa e grupo di Youth Camp ta haci mas deporte extremo, ya cu muchanan no ta bay sali for di nan cas pa djis un tiki sport. Nan si kier haci algo mas extremo.
Sra. Jones a splica cu e aña aki, tin un paar di cambionan. Antes e Youth Camp tabata mas laat den atardi, pero a ripara toch cu e mayornan ora di bay traha den vakantie, nan tabata tin mester di un luga pa baha tur dos yiu pareu y pesey e aña aki e camp ta den e mesun horario pa 8 or di mainta, te cu 4 or di atardi.
Pa muchanan cu ta bay Trai Merdia na YMCA, ta paga un suma adicional di Fls. 75, – adicional pa siman. Pa miembronan di YMCA esaki ta bira Fls. 100,- pa siman y pa no- miembro ta bira Fls. 125,-.
Por ultimo Sra. Jones a splica cu e camp lo tin un duracion di 4 siman, menos e ultimo 2 simannan. Mayoria camping no tin camping e ultimo dos simannan. Den futuro, kisas lo pone dos siman extra. Pa e prijs cu e muchanan ta paga, esaki ta inclui cuminda cayente merdia, un snacks atardi, como tambe tur e actividadnan e.o. Bustrip, actividadnan pafo di club etc.