Anualmente YMCA Aruba ta ofrece su miembronan y pueblo en general e oportunidad pa participa den tres diferente camp: April Camp, Summer Camp i October Camp. E aña aki no ta un excepcion!
Durante e vacacion escolar den luna di April 2017, YMCA Aruba lo tene su famoso “April Camp” pa muchanan di 4 pa 12 aña di edad y hobennan cu un edad entre 13 i 17 aña . YMCA su April Camp lo inicia ariba diamars 18 di April 2017 i lo termina ariba diabierna 21 di April 2017. Pa facilita tur mayor durante e periodo di vakantie, YMCA ta ofrece su Camp for di 8’or di mainta te cu 4’or di atardi . Inscripcion lo inclui tur actividad, bebida, cuminda cayente como punch y snack.
Pa nos muchanan y hobennan esaki ta significa un siman recreativo, deportivo y dibertido! E actividadnan pa nos muchanan lo ta varia i lo consisti di diferente sorto di wega, cooking & baking, arts & crafts, deporte, community pool y mucho mas! Actividadnan pa nos hobennan lo consisti di deporte, scavenger hunt, hiking, conoce nos flora y fauna, cooking & baking y mucho mas!
E periodo di inscripcion ta habri desde diamars 21 di Maart 2017. YMCA ta pidi un contribucion chikito pa inscripcion. Miembronan di e programa ‘Y’s Care’ ta paga solamente Afl. 50,00 i miembronan di YMCA ta paga solamente Afl. 65,00. Esnan cu no ta miembro, pero ta desea di participa tambe por haci esaki por medio di un contribucion chikito di Afl. 85,00. Prijs ta inclui tur actividad, transporte durante di dia, bebida, snack i cuminda cayente durante di lunch.
Pa inscribi por pasa na YMCA San Nicolas situa na Pastoor Hendrikstraat 55 of na YMCA Dakota situa na Calabasstraat 1. Pa mas informacion por yama libremente na 5845303 (San Nicolas) of 5823072 (Dakota), tambe ta posibel pa pidi informacion por medio di nos e-mail [email protected] of via nos pagina di facebook: YMCA Aruba.