Louis Cremony, yiu homber di Lolita a conta cu e evento recientemente na Colombia tabata hopi emocional p’e, el a trece hopi memoria cune, memoria di con su mama a lucha pa lanta su famia. “Na e evento mi mester a devela e escultura di mi mama y pa mira cu a pensa di duna mi mama e honor aki ta increibel. Hopi hende lo nunca tin e experiencia aki, mi no por describi mi sentimento. Mi a yora di alegria y a corda cu mi mama semper a bisa cu ora cu e muri hende lo keda papia di dje”.
Mi mama Lolita a bin Aruba for di Santo Domingo na un edad hopi hoben (21), na comienso e tabata traha bou di un hende, algo cu e no a gusta pues a stop. Esaki a motiv’e pa cuminsa traha cos dushi pa bende y e placa cu e haya e tabata spaar. “Despues el a conoce mi tata y nan a casa, haya 4 yiu homber y un yiu muhe. Na dado momento a habri un negoshi na cas unda tabata bende cos dushi, pinda, cocada entre otro. E negoshi aki no a bay bon como cu mi mama tabata yuda hopi hende cu credito cual hopi tabata keda sin paga y pues mester a cera e negoshi. A pesar di a pasa den e periodo dificil aki mi mama a continua bende su cos dushinan uzando un garoshi cu mi tata a traha.
Cu e garoshi aki Lolita tabata pasa cu su garoshinan te na Oranjestad, unda cu e tabata busca fruta for di un señora, bende esakinan, traha su ganashi y paga e señora e costo di e frutanan.
“Mi mama tabata un persona cu hopi orguyo y tambe hopi fuerte. E tabata e weso di lomba di nos famia, e no tabata acepta ningun coy kens di ningun hende. Locual cu el a siña nos ta, pa respeta hende cu ta respeta bo y si ta e contrario e ora no.”
Segun sr. Cremony ta conta orguyosamente di su mama, e ta splica con e tabata mercadea su productonan tur rond di e Isla. Lolita tabatin su manera pa atrae hende cu despues di tempo hende tabata buske y no por a warda pa e pasa cu su cos dushinan. Lolita tabata sinta na entrada di refineria Lago tambe, unda cu e tabata warda e empleadonan pasa pa e bende su productonan. “Otro cos cu tabata caracterisa mi mama ta cu e no tabata duna cambio di placa bek. Pues si bo a cumpra algo cerca dje y a page y ta negocia cubo y ta duna bo algun producto extra enbes di buelta di placa”.
“Mi a wordo lanta den un escena unda cu mi mama constantemente tabata traha. E tabatin e pensamento cu e no ta bay depende riba ningun hende pa nada y cu bo mester traha pa loke bo kier. E tabata bisa nos: ‘Si bo no traha p’e, bo no kier e’ y esey ta loke mi ta hiba cumi te dia di awe”. Tur loke el a siñami tin mi unda mi ta awe ‘self employed’ pa hopi aña, Sr. Cremony a termina bisando.