Xiomara Ruiz Maduro: Mocion di MEP pa renoba Arco Iris Kleuterschool a keda aproba unanimamente

Promer cu e vacacion di fin di aña un parti di e dak di Arco Iris Kleuterschool a sufri daño debi na awacero fuerte cu a presenta. Como cu e dak di e scol preparatorio aki ta di asbest y ta mas di 60 aña biew, Fraccion di MEP durante e reunion publico di presupuesto suppletorio, a entrega un mocion pa pidi Gobierno atencion debido pa e situacion cu a presenta y tambe pa pone fondo disponibel pa renoba e school completamente. E mocion aki a keda aproba unanimamente pa Parlamento di Aruba.

Den e mocion nos Fraccion a urgi Gobierno pa laga e instancianan concerni haci un investigacion di e daño cu a tuma lugar na e dak di asbest y pa laga e instancianan concerni haci un investigacion di e otro trabounan cu mester tuma lugar pa asina renoba e scol preparatorio completamente. E scol tin 60 aña di existencia y ya tabata na turno pa wordo renoba completamente. Nos a urgi Gobierno tambe pa aloca e fondonan sea den e Fondo di Enseñanza cu a wordo lanta poco tempo pasa, sea den FDA of den presupuesto 2013 di Pais Aruba pa asina haci e renobacion aki mas liher cu ta posibel.

Como cu e dak di asbest a kibra, esaki ta forma peliger pa salud di e muchanan, maestronan y mayornan. Pa e motibo aki nos a urgi Gobierno pa aloca Arco Iris Kleuterschool na un lugar na unda e muchanan y e maestronan por ta safe di e peligernan di asbest y pa informa e maestronan y mayornan di e scol mas pronto cu ta posibel riba e alocacion temporario di e scol.

Mester remarca cu autoridadnan concerni hunto cu e cabesante di e scol na momento cu nan a constata e peliger cu a presenta, di biaha a tuma e decicion corecto di sera e scol y manda e muchanan cas te ora haya mas claridad di e peliger di asbest cu a presenta na e scol. Esaki ta di aplaudi y ta mustra cu nos a bira mas conciente di e peligernan di asbest y cu nos a siña di a casonan cu a presenta na entre otro Sint Anna School y Mon Plaisir. Locual si ta di lamenta ta cu e mayornan te ainda no a wordo poni na altura cu ta debi na e peliger di asbest e scol preparatorio aki a wordo sera.

Ta di spera cu e rapportnan di investigacion di e instancianan concerni keda finalisa pronto pa asina e maestronan y e mayornan haya sa kiko a pasa enrealidad na e scol. Nos ta spera tambe di tende di Gobierno den e proximo dianan na unda e scol lo wordo aloca temporalmente. Ban spera cu den e caso di asbest na Arco Iris Kleuterscool Gobierno actua debidamente y ehecuta e mocion di MEP pa renoba e scol completamente.