LONDON, Reino Uni- E Duke di Cambridge y Prins Harry lo rindi homenahe na nan mama, Prinses Diana na vispera di e di 20 aniversario di su morto. Esaki lo tuma luga na Kensington Palace.
Un vocero Palacio di Kensington a bisa cu e bishita di Prinses Diana su yiunan lo permiti e dos prinsnan pa rindi tributo na bida y trabao di nan mama, ariba e vispera di e di 20 aniversario di su morto.
Hunto nan lo reflexiona ariba e logronan significativo di e prinses, y e legado di su trabao cu ta te dia di awe ta wordo menciona.
Contrario cu 10 aña pasa, ora cu e servicio di tributo a wordo atendi door di Reina Elizabeth, otro personahenan importante di e famia real Britanico y 500 invitado mas na e Kapel di Guardianan na e baraknan cerca di Palacio di Buckingham, e tributo di diaranson lo ta uno mas senciyo y mas personal.
E aña aki lo no tin un servicio publico ya cu su yiunan a scoge pa un servicio priva chikito pa recorda su nacemento, dia 1 di Juli, pa un biaha mas dedica na su graf, cu ta ariba un isla priva cerca di un lago propiedad di famia Spencer na Althorp House na Northamptonshire. Esaki a conta cu presencia di famia Spencer, William, Kate y Harry, yiunan di e Dukenan di Cambridge, George y Charlotte, y cual a wordo dirigi pa Arzobispo di Canterbury, Justin Welby.
Sinembargo, nada mas relaciona cu e di 20 aniversario di morto di Lady Diana Spencer a wordo subestima.
Un biaha mas, Dianamania ta tuma e pais over. Dos decada pasa, e biografo real Sarah Bradford, precisamente a predeci cu Diana lo persegui e famia real “sin por scapa, kisas, mas awo cu e ta morto cu si e lo a keda na bida”.
E Hardin Blanco y e pedido pa traha un statua di nan mama ta e dos tributonan principal cu e dos prinsnan a scoge.
E hardin, inspira ariba Diana su bida, su estilo y su imagen, como su bisti blanco, denomina e “Elvis” di e diseñado Catherine Walker, cu rosanan blanco, narcisonan blanco y “forget-me-nots” rond di e Sunken Garden ya existente na su cas, di cual e tabata stima. E rumannan, y e Dukesa di Cambridge, lo topa akinan cu representantenan di obranan di caridad cu tabata wordo yuda door di Diana.
E estatua, cual tabata ordo di e prinsnan, lo wordo lanta den e hardin di Palacio di Kensington den un fecha futuro. Anunciando e obra di arte aki na Januari, William y Harry a bisa: “Ta 20 aña desde cu nos mama a bay laganos y ta tempo pa reconoce su impacto positivo na Reino Uni y rond mundo cu un statua permanente. Nos mama a touch asina tanto bida. Nos ta spera cu e estatua lo yuda tur esunnan cu ta bishita Palacio di Kensington pa refleha ariba su bida y su legado.
Fuente: https://www.theguardian.com