WASHINGTON/CARACAS- White House diamars a rechasa e oferta di e presidente di Venezuela, Nicolas Maduro, di entabla un dialogo cu e mandatario Mericano, Donald Trump, sea na Washington of na Caracas.
Desde e presidencia Mericano a sigura cu e encuentro aki lo ta posibel solamente ora cu e democracia wordo restaura na Venezuela, segun e agencia di noticia, EFE.
E invitacion pa un dialogo cu Maduro a extende na Trump a bay via e red social Twitter. Un vocero di e Conseho di Siguridad Nacional di White House a reacciona riba e mensahe den condicion di anonimato: “Manera nos a bisa na Augustus ultimo, presidente Trump lo papia cu e lider di Venezuela, cu mucho gusto, asina cu cierto pasonan wordo tuma y e regimen di Maduro restaura e democracia den e gran pais ey”.
E contesta Mericano riba e invitacion di Maduro tabata mescos cu el a manda na Augustus, na momento cu e presidente Venezolano a propone na Trump, pa papia via telefon. A traves di un comunicado, presidente di Merca e tempo ey a sigura cu e lo comunica cun’e “tan pronto cu democracia wordo restableci den e pais”. Algun hora prome Trump a declara cu e no ta descarta un intervencion militar na Venezuela.
Como contesta ariba e declaracionnan aki, minister di Defensa di Venezuela, Vladimir Padrino, a califica e advertencia di e presidente di Merca, como un “acto di locura, di berdadero extremismo”.
E invitacion di Maduro na Trump ta yega na un momento di tension pa dialogo den e continente, ya cu Peru a declara cu e Presidente di Venezuela lo no ta bon bini den e Cumbre de las Americas, cual lo wordo celebra na April proximo.