E torneo mas anticipa den Beach Tennis pa nos region, pa purba yega na un titulo representando bo pais, ta cuminsa diabierna awo, 11 November 2016 y Aruba lo ta e anfitrion. Weganan Panamericano di Beach Tennis organisa pa ITF hunto cu e organisacion local di Beach Tennis BTA. Un torneo cu den pasado a tuma luga 3 biaha caba na Brazil pero e aña aki Aruba ta haya e honor pa organisa esaki
A comunica cu en total lo tin 6 pais participando cual nan ta USA, Puerto Rico, Venezuela, Ecuador, Brazil y Aruba. Tur es tempo Colombia tambe a logra inscribi un ekipo di hende muher cual ta yega na un total di 7 pais cu lo ta participando. Tur pais participante por inscribi un total di 2 team femenino, masculino como tambe mixto. Aruba ta e unico, como e anfitrion, cu por inscribi 3 team den cada categoria
Awe nos ta bay laga boso sera conoci cu e ekiponan femenino cu lo bay tin den nan encargo pa logra premio pa Aruba. Nos ta cuminsa cu e capitan cu ta Maria Buuts, kende sigur no ta un desconoci den e mundo di Beach Tennis na Aruba. Ya cu e experiencia participando na e weganan Panamericano, e tin e resposabilidad di guia e seleccion di Aruba. Su pareha den doubles femenino lo ta Maud Celaire. Un hoben multi talentoso cu lo por yega hopi leu den e deporte aki.
E di 2 team di Aruba ta Daisy Faro hunto cu Anne Hoogendam. Pa Daisy esaki lo ta su prome experiencia ya cu Anne a biaha den 2015 caba pa Brazil hunto cu Maria Buuts pa representa Aruba.
Team #3 ta Kaman Hui y Lella Arends, kende nan a dedica e ultimo lunanan aki pa biaha y participa den algun torneo internacional como tambe inverti den nan mes pa a ricibi training cerca un di e top hungadonan di Beach Tennis na Alemania.
Por remarca acerca, cu e seleccion aki tin sigur mas cu 1 aña ta train 2 biaha pa siman y tambe tur seleccionado mester participa den e liga di Beach Tennis cual ta trece cune cu cada un ta activo sigur un 2 pa 3 biaha pa siman practicando e deporte aki
No ta keda nos nada otro cu invita henter comunidad pa ta presente, entrante diabierna awo, na Beach Tennis Aruba Club na Tropicana pa asina aki apoya tur e participantenan pero principalmente nos ekipo di Aruba. Esaki lo cuminsa diabierna awo, 11 November pa 10or AM. E prome weganan lo ta e mix doubles y pa 5or PM e prome weganan di doubles men & women lo cuminsa. Diasabra 12 November lo continua pa 10or AM cu quarter finals den mix doubles y pa 5or PM lo tin e weganan di semifinal den men y women doubles. E semifinal di mix doubles lo tuma lugar diadomingo 13 November cuminsa pa 10or AM. Tur e weganan aki lo tuma luga na Beach Tennis Aruba Club situa net banda di Tropicana Hotel. E final mes di cada categoria lo cuminsa diadomingo 5or PM pero e biaha aki nan lo tuma luga riba Eagle Beach, riba center court, cu ta wordo prepara pa e evento di mas grandi den e mundo di Beach Tennis, cual ta e Aruba Open ITF Tournament, cu lo cuminsa su dialuna siguiente esta, 14 November 2016