Cu Sunrise Solar Park, pronto Aruba lo tin e parke solar di mas grandi riba nos isla y tambe den Caribe. Asina director di WEB Aruba, Luis Oduber a indica diamars ultimo durante e ceremonia di firmamento pa inicio di e proyecto aki hunto cu e compania Spaño ISOTRON.
E proyecto ambicioso di 5.9 MW ta un inversion di 16 miyon florin cu lo ocupa 92.000 meter cuadra riba e tereno di CITGO, den e area di Lago Heights. Segun ambos partner e parke solar lo dura mas o menos 8 luna pa keda cla, pa finalmente integra esaki riba e red di coriente di Elmar.
Na mes momento e ‘Sunrise Solar Park’ ta otro logro cu ta forma parti di e vision sostenibel pa aña 2020 cu Gobierno di Aruba a implementa bou di liderazgo di Prome Minister, Mike Eman y Minister di Turismo, Transporte, Energia y Medio Ambiente, Mike de Meza.
Director Oduber a splica durante e ceremonia di firmamento, cu lo cual ta haci e proyecto unico pa Aruba y e region di Caribe, ta cu WEB Aruba mes ta bira e doño di e parke solar. “Normalmente proyectonan asina nos ta yama un “Independent Power Producer”(IPP), pues e placa ta bay afo. Den e caso aki orguyosamente nos por bisa cu nos mes lo ta e doño di e proyecto grandi aki”, asina Luis Oduber a expresa.
Proyectonan di energia solar cu ta forma parti di e portafolio di WEB bou di e strategia di “Aruba Renewable Energy Strategy” (ARES) cu ya caba a keda completa ta entre otro, Parke Solar Aeropuerto Reina Beatrix, Scol Basico Kudawecha, Abraham de Veer School y MFA Noord.
Segun director Luis Oduber e parke solar di 5.9 MW na San Nicolas ta un di e 2 proyectonan solar grandi cu falta pa completa e lista di proyectonan solar cu WEB tin proyecta.“Nos meta ta pa yega na un 5% average di penetracion di energia di solo riba nos red”, si compara cu esun di biento, esta Wind Park Vader Piet (WPVP), e ta alrededor di 18%, asina Oduber a splica.
Desde october di aña pasa WEB Aruba a inicia e proceso pa recluta informacion di diferente compania internacional y local, cu lo por ehecuta e proyecto di parke solar aki conhuntamente cu WEB. Un total di 64 compania a manifesta nan interes pa forma parti di e proyecto mediante un ‘bid’.
Despues di a realisa un screening y evaluacion riba e capacidad, aspectonan tecnico y riba tur e servicionan cu cada compania ta ofrece, WEB a selecciona 10 compania cu finalmente a participa den e proceso di ‘bid’, di cual e compania ISOTRON a sali e ganado.
WEB Aruba ta orguyoso di por duna inicio na e gran proyecto aki, cual lo demostra un biaha mas cu Aruba ta lidera den implementacion y uzo di energia sostenibel den Caribe. Na mes momento, WEB ta gradici tur su departamentonan cu a aporta na e desaroyo di e proyecto y tambe na partnernan manera Gobierno di Aruba, Utilities Aruba, Elmar, ISOTRON, Refineria di Aruba y CITGO cu tambe a colabora grandemente pa duna inicio na desaroyo di ‘Sunrise Solar Park’.