Den medio di komunikashon a sali diferente artikulo tokante e trahadonan di Wardakosta ku awor por bai kas ku nan arma. Na desember 2016 Minister di Hustisia Sr. Navarro a tuma e desishon pa duna oportunidat na e trahadonan ehekutivo di Wardakosta oportunidat pa bai kas ku nan arma. Pa hasi esaki posibel, direktor di Wardakosta a establese sierto kondishonnan ku mester a kumpli kune. Entretantu a kumpli ku e kondishonnan ku e direktor di Wardakosta a bini kune i e trahadonan di Wardakosta ku ta bini na remarke por hasi un petishon pa bai karga nan arma den nan tempu priva. Un di e kondishonnan aki ta ku e trahadonan en kuestion mester a sigui sierto kurso pa karga nan arma den tempu priva i e responsabilidat ku esaki ta trese kune. Steunpunt Korsou, e base di Wardakosta na Korsou a duna e kursonan aki i e grupo entretantu a finalisa esaki.
For di publikashonnan ta parse tambe ku ta tur trahado di Wardakosta ta karga arma. Esaki no ta berdat. E mayoria di trahadonan no ta karga arma. Ta trata di un grupo chikitu. Ta di lamenta ku e sindikato NAPB ta trese esaki di un forma deskabeya dilanti. E ta un medida ku e minister di e tempu ey a tuma despues di un estudio ekstenso i ku Wardakosta di un manera kuidadoso a duna kontenido na dje. Dor di trese esaki di tal forma den publisidat por krea situashonnan peligroso pa tur trahado di Wardakosta