Lider di MEP, Sra. Evelyn Wever Croes a duna su opinion ariba e resultado di eleccion na Hulanda ta mustra cu e votadonan no ta contento cu e forma con e gobernacion a bay den 8 aña. E ta splica.
E partido di Prome Minister Rutte a keda e partido di mas grandi, a pesar di a bay atras den asiento. Partido VVD, cu tabata den gobierno den Gabinete Rutte, a bay masha hopi atras den voto, cu nan a cay te na 9 asiento den Tweede Kamer y practicamente ta for di pantaya aworaki. Nan lo mester tuma nan tempo pa nan rebuild.
Pero Hulanda a vota contra di e actual gobernacion y ta pidi pa un cambio. Aunke e cambio ainda mester warda ariba dje, ya cu e temporada di formacion mester bin ainda y e scenario a cambia cual ta haci e proceso un tiki mas largo.
Loke por saca afo ta cu pueblo ta husga e gobierno despues di tanto aña den gobernacion y ora cu e pueblo pidi un cambio, e merece di mira un cambio. SI hasta si VVD, cual ta e partido di Rutte keda den gobierno, e lo mester cambia su approach.
Partido Partij van de Arbeid, partido ruman di MEP, a haya un derota pisa. Esaki ta mustra cu ora un partido social democrata uni na un partido liberal, e votadonan ta castiga e partido. Pesey ta hopi importante cu ken cu ta pensa riba coalicion, mester pensa bon cu ken ta forma coalicion.
Pero si Sra. Evelyn Wever Croes ta contento cu e pensamento un tiki iskierdista, na e pensamento social democrata a keda perdura y ta mira cu Groen Links a bay dilanti den voto. Pa loke ta e partido di PVV di Wilders, cu no a saca loke cu tabata spera cu e la gana. Y Hulanda ta contento cu e populismo no a gana.
Hulanda aworaki tin un reto su dilanti pa forma un gobierno. Pa Aruba, Sra. Wever- Croes na Aruba nos mester ta menos molester posibel pa Hulanda. Sra. Wever- Croes ta splica cu Aruba mester tin un relacion di madurez cu Hulanda. Cu esaki e kiermen cu Aruba mes mester soluciona su problemanan, y si di berdad tin problema extremadamente grandi, e ora por bati na porta di Hulanda, pa yudansa.
Trata Hulanda cu respet, pa por haya respet bek. Si cambia e approach pa cu Hulanda, Aruba ta gana hopi mas respet y lo permiti gobierno goberna mucho mas miho, a base di madurez y a base di respet, segun Sra. Evelyn Wever- Croes, lider di partido MEP.