Cuerpo policial ta prepara pa e manifestacion di diahuebs contra criminalidad, cual tin permiso pa marcha di 4’or di atardi te cu 7’or di anochi. Lito Lacle, vocero policial, a remarca cu Cuerpo Policial tambe nan ta convivi cu pueblo di Aruba pa loke ta pasando den comunidad y nan ta haciendo full nan best pa resolve mas caso posibel.
Ayera, diamars tabata tin un Team Grootschalig Onderzoek, cu ta bezig ta haciendo nan investigacion. Tur hende tin derecho di expresa su mes. Esaki ta a base di articulo 1 di nos Constitucion. Trabao di Polis ta percura pa orden publico. Segun Lacle, ta spera tur cos bay trankil. E tarea di e multitud ta pa manifesta nan disgusto y polis ta respeta esey.
Vocero Policial, Lito Lacle, a sigui splica cu tin di compronde cu chef di districto 1 a combersa cu e manifestantenan y tin un comunicacion extenso cu nan pa yega na acuerdonan cla pa tur cos cana soepel. E organisadornan di e marcha aki tampoco no kier pa tur cos bay malo y nan tarea ta pa entrega nan manifiesto.
Polis lo ta tolerante. Atrobe nan ta respeta cada ken nan opinion y ta percura pa orden publico. E organisadornan tambe no lo kier pa nada for di man y lo percura pa esaki.
Polis ta prepara y lo escala si mester, pero segun Lacle, e tin fe cu tur cos lo bay bon.
Polis cu man yen
Polis ta bezig cu hopi caso. Canando for di diabierna bin te cu awe, tin diferente caso andando. Incluyendo esun di ayera y esun di morto den trafico di mainta tempran. Cuerpo Policial tin dia y lunanan druk. Un biaha mas, nan trabao ta pa resolve tur caso y por ehempel, ta investigando e morto den trafico di ayera mainta pa sa precies kico a pasa y pa tene e famianan di e fayecido toch trankil.
Comunidad tin un papel pa yuda
90% di casonan ta wordo resolvi cu informacion di pueblo di Aruba. Tin un tiplijn cu ta 11141. E ta un departamento cu Lacle a traha eynan y e forma mas practico pa handle ta pa interactua cu e departamento aki y duna informacion. Tin biaha ta laga informacion atras riba tiplijn, pero no suficiente pa cuminsa cu un investigacion of net no suficiente pa resolve e investigacion. Polis ta prefera pa interactua y ta garantisa cu e denunciante ta keda anonimo.
Pueblo su rol ta importante. Mayoria di e casonan cu polis ta cuminsa, e papel di pueblo ta 90% di e trabao, Lacle a splica.