NEW YORK CITY, New York – Un veterano di Marina di Merca cu a dal cu un auto contra peatonnan riba Times Square di New York, matando un muhe y heridando otro 22 persona mas, a wordo acusa di homicidio y intento di homicidio, polis a informa diabierna.
E incidente di diahuebs, a lanta e temor den e capital financiero di Merca, despues di e embestidanan mortal di auto na London, Berlin y e ciudad Frances di Nice, pero autoridadnan a bisa cu no tin prueba cu e hecho aki tabata relaciona cu terorismo.
Richard Rojas, di 26 aña, for di Bronx, a wordo aresta na e luga y posteriormente acusa di homicidio den segundo grado, 20 cargo pa intento di homicidio y cinco pa homicidio den vehiculo agrava, polis a bisa.
E muhe a wordo identifica como Alyssa Elsman, di 18 aña for di Portage, Michigan. Su ruman muhe di 13 aña ta entre e heridonan. Cuaer di e heridonan ta keda den estado critico, autoridadnan a bisa. Rojas a dal e peatonnan cu su Honda Accord ora cu el a subi acera durante tres cuadra riba velocidad halto, prome cu el a dal contra un palo di luz di metal y a stop.
El a wordo aresta pa core auto burachi na 2008 y 2015 y a wordo deteni na principio di e luna aki cu cargonan di menasa, polis a bisa. Tras su aresto diahuebs, el a wordo someti na pruebanan di droga y alcohol. Marina Mericano a informa cu el a sirbi for di 2011 pa 2014. El a wordo galardona cu e Medaya di Servicio di Defensa Nacional y e tabata destina na Florida, Illinois y South Carolina.
Fuente: www.elespectador.com