Miembronan di Gabinete Mike Eman I y II no a sinta den nan oficina y di eynan goberna, pero a sigui ta den contacto cu pueblo. Ta hustamente via di e estrecho contactonan aki cu pueblo, por a scucha e preocupacionnan cu mayoria biaha tin di haber cu nan bida diario, manera siguridad den trafico.
Den e diferente bishita den bario tambe Prome Minister Mike Eman tabata wordo acerca pa habitantenan preocupa pasobra automobilistanan no ta tene consideracion den areanan habita y ta core cu velocidad halto cu ta trece bida di habitantenan na peligro. “Na inicio nos a haya un situacion di trafico penoso cu tabata for di control y a cuminsa tuma e pasonan necesario, entre otro bin cu polis motorisa mientras cu a sigui busca e miho formanan cu por introduci den trafico cu por yuda brinda un miho siguridad,” Minister di Husticia Arthur Dowers a duna di conoce den un declaracion.
Asina pueblo tabata pidi pa bin cu “sleeping police”, pero e sistema aki ta uno hopi caro y mirando e demanda cu tin lo no por yega den tur bario cu esakinan. Asina e expertonan di DOW a sinta hunto, pa crea un forma di “sleeping police” cu tambe ta frena e trafico. No solamente e sistema crea ta menos costoso, pero ta causa menos molester den trafico durante su construccion, ya cu e ta wordo realisa den un dia di trabou y ta mes efectivo cu sleeping police.
Ministerio di Husticia y di Infrastructura a bin ta trahando den forma estrecho cu otro pa mehora siguridad den trafico y tambe den introduccion di loke ta wordo yama ‘verkeersplatea’. “Esaki ta un medida hopi popular cu Gobierno a tuma y por mira cu mas y mas e ta wordo pidi tambe door di comunidad. Di un banda nos ta hay’e lamentabel cu hopi hende no ta comporta nan mes di un forma cu no ta respeta peatonnan, di otro banda e ta un medida cu a bini cune pa subi siguridad den trafico y proteccion di peatonnan,” Minister Dowers a bisa.