CARACAS, Venezuela- Venezuela ta den posesion di 5 mil misil tera- aire MANPADS, di fabricacion Ruso. Esaki ta segun un documento militar revisa pa Reuters y lo ta e arsenal mas grandi na Latinoamerica den e tipo di armanan aki, cual ta bira un fuente di preocupacion pa funcionarionan di Merca, mei mei di e creciente intrankilidad den e pais.
E gobierno socialista di Venezuela a uza e amenasa di un invasion “imperialista” di parti di Merca pa hustifica e acumulacion di arma y hopi di nan ta proviniente di su aliado, Rusia, durante e mandato di e fayecido Hugo Chavez.
E misilnan, cu por wordo opera pa un solo persona, ta representa un serie di menasa di e avionnan comercial y militar ora cu esaki ta bula na altitud abao.
Expertonan den arma a bisa cu ya pa basta tempo caba ta existi e miedo cu nan por wordo horta, bendi of lo por cay den e mannan robes, preocupacionnan cu ta lanta cabes door di e actual ola di protestanan anti- gubernamental den e pais petrolero.
No tin prueba di cu e estado Venezolano lo a uza of transferi su MANPADS, pero Mike Pompeo, director di CIA, a bisa siman pasa cu e misilnan di Venezuela ta representa un menasa di siguridad regional, “increiblemente real y serio”.
Politiconanan Mericano derechista, manera e senador Republicano pa Florida, Marco Rubio, a acusa Venezuela di colabora cu gruponan di insurgencia, entre nan e grupo Chiita Libanes Hezbollah y rebeldenan Colombiano FARC.
Gobierno Venezolano a considera cu e afirmacionannan aki ta mentiranan pa hustifica pa un posibel intervencion stranhero.
Fuente: www.reuters.com