Venezuela a stop tur suministro di crudo na e refineria na Corsou, pa evita cu esaki ta ki den man di ConocoPhilips. Tur cos ta indica cu por lo pronto, e situacion lo keda asina.
Siman pasa e compania Mericano a pone Belga riba instalacion i cuentanan bancario di PDVSA, na Boneiro, Sinta Estados i Corsou. Prome cu e accion, ya e refineria na Corsou, no tabata den operacion, debi na problemanan tecnico.
Durante presidencia di Hugo Chavez, Venezuela a nacionalisa diferente compania Mericano. Sinembargo un comision arbitrario di e Camara di Comercio Internacional na Pais, a dicta cu Venezuela mester compensa e Mericanonan, pa e perdidanan cu nan a sufri.
For di dialuna ultimo, Venezuela a laga saca nuebe tanker for di awanan teritorial di Corsou. Entre nan tabatin tambe barconan cu petroli Ruso. Ayera ‘deurwaarder’ a presenta tambe na Bullenbaai, caminda PDVSA tin un instalacion cu capacidad pa warda 16 miyon bari di crudo.
Sindicato i otro companianan dependiente di refineria a reacciona nervioso riba e noticianan. PDSVA ta nenga di duna declaracion na prensa. No ta sigur si e 1000 trahadonan di Isla lo por cobra nan salario pa fin di e luna aki.