WASHINGTON, D.C., Merca- Gobierno di Venezuela a anuncia cu e lo cuminsa cu e proceso formal pa retira for di e Organisacion di Estadonan Americano y cu e lo stop di atende na e reunionnan. Diesnuebe delegacion a aproba e resolucion diaranson pa e convocatorio pa un reunion di canciyernan pa discuti di e situacion na e pais, pero separa di e proceso pa activa e Carta Democratico. Tabata tin 10 voto na fabor y cuater abstencion.
E proceso di retiro di un pais ta dura dos aña y e delegacion por sigui participa. Pero den e caso aki e gobierno di Venezuela a anuncia cu e lo no haci esaki. Ta prome biaha den historia di OEA cu un pais ta dicidi na tuma su retiro.
Venezuela ta prefera un reunio cu e Comunidad di Estadonan di America Latina y di Caribe, Celac, cu a wordo convoca pa dia 2 di Mei. E reunion a wordo convoca riba peticion di Venezuela, y lo tuma luga San Salvador. E unico punto ariba agenda ta e crisis na Venezuela.
Diaranson, pa di ocho biaha den 24 dia oposicion Venezolano a purba di yega na Defensoria del Pueblo, sin exito. Efectivonan policial y militar a impidi e avance di e marcha cu bombnan lacrigomego y balanan di rubber. Dos persona a perde nan bida den e enfrentamentonan.
For di dia 30 di April cu e Tribunal Supremo di Justicia di Venezuela (TSJ) a emiti un sentencia pa asumi e competencianan di Asamblea Nacional, di mayoria opositor, e pais a drenta den un crisis institucional profundo, cu ya caba tabata grave door di problemanan social y escasez di productonan basico. Tres dia despues, e tribunal a hala atras, pero e descontento di e Venezolanonan no a para y nan ta sali di manera masivo ariba caya.
Partidonan opositor ta pidi cuater cos: cu e huesnan di e Corte Supremo wordo inhabilita, pa eleccionnan liber wordo celebra mas pronto posibel, liberacion di presonan politico, manera Leopoldo Lopez y ayuda humanitario pa cuminda y remedi na Venezuela.
E punto di inhabilitacion ta coresponde na Defensoria del Pueblo, pa loke e marchanan ta dirigi pa ayannan pa solicita e titular Tarek William Saab pa un contesta.