CARACAS, Venezuela- E pais Suramericano, Venezuela tin planea pa emiti un total di 100 miyon unidad di su divisa digital nacional, petro, respalda pa petroleo na un balor di 6 biyon dollar. Embahador Venezolano na Rusia, Carlos Faria, a estima e bentahanan di e oferta aki den un conferencia riba su economia digital, celebra diahuebs na Moscu.
“No tin otro criptomoneda cu tin garantianan similar, cu por haci’e asina atractivo y sigur”, Faria Tortosa a declara. El a recorda tambe cu e gobierno Venezolano tin programa pa crea cuater zona economico cu funcionnan special pa e petro.
Caracas ta considera e criptodivisa como un tool pa resisti na sancionnan di Merca, e representante diplomatico a splica. Presidente Nicolas Maduro a hay’e forsa na presenta e proyecto aki door di e presion politico y financiero cu Merca ta eherciendo riba e pais Latinoamericano.
E diplomatico a recorda cu Cuba y Iran ta bou di sancionnan pa varios decada. Rusia tambe ta familiar cu e situacion den e ultimo añanan aki. “Nos mester uza e bentaha cu e tecnologianan por ofrece contra di e agresor”, el a sugeri.
Venezuela na comienso di aña a bira e prome pais pa emiti un criptomoneda respalda pa petroleo. E benta di petro a cuminsa na Maart, despues di un mes di preventa.
Fuente: https://actualidad.rt.com