E Canciyeria Venezolano a denuncia den un comunicado cu Colombia ta purba di “provoca” e Gobierno di Nicolas Maduro cu e presencia di “vehiculonan blinda di combati” na meternan leu di e frontera entre ambos pais.
Caracas a expresa “su mas energico rechaso na e insolito y inadmisibel provacion ehecuta pa e Republica di Colombia, cu e presencia di vehiculonan blinda di combate na meternan leu di e liña fronteriso cu Venezuela e dia di awe (diadomingo) na Paraguachon, Departamento di La Guajira.”
E Canciyeria tambe a condena cu “autoridadnan halto Colombiano” ta sigura cu e pais aki ta prepara pa ricibi un oleada di migrantenan Venezolano “producto di un gran evento di violencia”, loke el a considera “supuestonan falso, pa hustifica un intervencion na Venezuela.”
“E provocacion grave cu a sosode riba e dia di awe ta pretende desvia e atencion riba e profundo crisis politico y social cu ta acontece den e Valle del Cauca, Buenaventura, cual poblacion a reclama e atencion di e Estado Colombiano den areanan esencial pa bida,” e texto a agrega.
Den e region pober di Buenaventura, principal puerto di Colombia riba e Pacifico, a sigui diadomingo cu protestanan pa reclama mehoracionnan social y economico, den marco di un paro civico.
E paro, cu ta pretende mehoracion di infrastructura y celeridad den e obranan pa garantisa awa potabel y salud na e poblacion, a cuminsa dia 16 di Mei y tabata tin un oleada violento diabierna, cu sakeo y disturbio den e ciudad, cu a laga mas of menos 80 persona deteni y un polis morto.
Den su comunicado, e Ministerio di Exterior Venezolano ta alerta ademas riba “e paralisacion di acuerdonan di paz di parti di e elite cu Colombia ta goberna, frustrando tur e esfuersonan internacional cu a logra pa haci realidad e fin di e guerra” den e pais aki.
“E Republica Bolivariana di Venezuela, ta exigi e paro di e actonan di provocacion y haci un yamado na e comunidad internacional door di mantene alerta na e accionnan aki cu ta pretende na afecta ainda mas e relacionnan bilateral entre nos paisnan,” e texto a agrega.
Fuente: http://www.elespectador.com