Curacao: Relashoná ku diferente ladronisia ku violensia serio kometé den e área di Banda Abou i mas spesífiko na Westpunt riba ekstranheronan, polis pa algun tempu kaba ta investigando e kasonan aki profundamente. E investigashon aki a kulminá den detenshon di kuater hòmber sospechoso.
E promé detenshon a tuma lugá djamars 14 di mart 2017 den oranan trempan di mainta na un kas na Westpunt. Akinan e tim di aresto a detene e homber S.L.H. nasé na Kòrsou 20 aña di edat.
E di dos detenshon a tuma lugá djarason 15 mart 2017 den oranan di anochi na warda di polis na momento ku e hòmber G.G.G.A. nasé na Kòrsou 19 aña di edat a bin entregá su mes despues ku polis a bai buské na kas.
Kontinuando ku e investigashon den e kaso aki, djaweps 16 mart 2017 den oranan di atardi, tim di aresto a detené dos otro sospechoso na Westpunt:
J.R.V. nasé na Kòrsou 23 aña di edat
J.H.V. nasé na Kòrsou 25 aña di edat
E tim investigado a realisá diferente entrada hudisial i a haña i konfiska:
Un(1) skopèt di kèlki
Un(1) pistol di alarma
Ipad
Telefòn
Un kantidat di otro kos ku ta di importansia pa e investigashon
A presentá e sospechosonan dilanti un fiskal ouksiliar ku a ordená nan enkarselamentu pendiente mas investigashon.