Presidente di FTA, sr. Hubert Dirks, ta papia tocante e problemanan cu algun casinonan ta confrontando actualmente.
Sr. Dirks ta mustra cu e mundo di casino ta uno cu retonan dificil y mester atende cu esakinan si ta desea di sigui mantene casinonan na Aruba como parti di e producto turistico. Unda cu FTA representa trahadonan, e situacion no lo bay facil. E trahadonan di Excelsior Casino por ehempel a caba di bira miembro cu FTA. E contract di Excelsior Casino cu e doñonan di Holiday Inn Hotel lo termina pronto y a reuni cu tanto abogado di e casino y abogado di e hotel. Locual a bin compronde ta cu e contract en berdad lo termina den luna di September, pero e compania a logra pa extende esaki y continua cu su servicionan. Manera cu e casino continua y si haya un doño nobo, e trahadonan automaticamente lo wordo pasa p’e doño nobo. Sin embargo, esaki no lo bay facil, pasobra den mayoria caso e dunado di trabou ta desea di tuma un compania over sin ningun trahado of sindicato.
Sr. Dirks ta mustra cu FTA ta representa e trahadonan y ta sinti cu e trahadonan mester keda uni y para pa nan derecho. FTA ta spera cu e companianan tene cuenta cu ta tin mama y tatanan di famia trahando y nan kier pa nan keda cu nan cupo di trabou sin importa kico pasa cu e casino. E garantia pa trahadonan no perde nan trabou ta dificil, pero e presidente di FTA ta sinti cu dunadonan di trabou tambe mester por ta mas consciente pa cu e trahadonan.