DEN HAAG, Hulanda – Den un investigacion externo di ex hefe di polis, Gerad Bouman di Nationale Politie, tambe ta wordo mira e papel di e ex minister di Siguridad y Husticia, Ivo Opstelten y esun actual, Ard van der Steur.
Casi full oposicion a pidi pa esaki.
Van der Steur a cumpli cu e deseo aki, segun un carta cu el a manda diamars pa Tweede Kamer. Oposicion kier sa entre otro si e sosten di Centrale Ondernemingsraad a wordo “cumpra” pa un reorganisacion enorme cerca polis.
E investigadornan a mira na e envolvimento di Bouman riba e discrepancianan di Centrale Ondernemingsraad (COR) di Nationale Politie. Investigacionnan interno a mustra mientras tanto cu COR a duna gran parti di su placa na entre otro fiesta, dinners y huurmento di “imagocoaches.”
“Tin papia aki di gastonan disproporcional halto sin ningun meta,” segun hefe di polis Erik Akerboom, a bisa siman pasa.
Tur miembro di Centrale Ondernemingsraad (COR) di polis a dicidi di retira pa motibo di e investigacion. “Loke a pasa a atacha e confiansa di e participacion,” segun nan a bisa den un declaracion cortico. “E confiansa a wordo daña. Nos ta lamenta cu nos coleganan riba caya a wordo dirigi riba e situacion cu a surgi rond di COR.”
Influencia
E comision ta mira kico ta e envolvimento di e ex hefe di polis riba e supervision di e finansasnan di COR. Tambe ta wordo mira si su maneho riba parti aki tabata tin influencia riba e tumamento di decision di e Ondernemingsraad.
Segun Van der Steur, ta mas cu husto cu e papel di e ex minister y e departamento tambe wordo investiga. “Ta un pregunta totalmente logico pa sa si e minister y e ministerio tabata na altura.”
Bouman a stop temporalmente
Loke a wordo acorda ta cu Bouman, durante e investigacion, no ta eherce ningun tarea pa cuerpo policial. Esaki tambe oposicion tabata kier. Na principio Van der Steur a bisa cu Bouman por keda como consehero.
Bouman ta duna conseho na polis desde su salida como hefe di polis. El a completa recientemente un rapport riba e problemanan di polis den Caribe Hulandes.
Ken ta esun cu ta bay haci e investigacion externo, ainda no ta conoci. Van der Steur no por duna cu precision ki ora esaki lo keda cla. E no kier mara ningun “eindtermijn” na esaki.
Fuente: NU.nl