Debi cu na diferente pais tin casonan di Gele Koorts e demanda pa e vacuna aki ta grandi. Recientemente dia 23 di maart Departamento di Salud Publico a ricibi un total di 2500 vacuna y pa awor esakinan a caba.
Pedido pa mas vacuna a wordo haci trempan, pero pa motibo di e demanda grandi internacional, PAHO e Organisacion di Salud, ta manda nan vacunanan prome na paisnan cu tin brote (outbreak). Pa e motibo aki nos mester warda riba e produccion nobo cu por tarda un poco. Na momento cu Departamento di Salud Publico ta disponi di e vacunanan, nos lo avisa comunidad mes ora.
Departamento di Salud Publico kier enfatisa cu e vacuna ta un exigencia pa turistanan cu ta procedente di paisnan unda tin Gele Koorts, pa residente di Aruba e falta di e vacuna no lo stroba bo entrada pa Aruba. Y pa personanan cu ta riba 60aña, e no ta necesario pa nan haya e vacuna aki.
Pa mas informacion por tuma contacto cu seccion di Malesanan Contagioso di Departamento di Salud Publico na 522-4200.