SAN JOSE, Costa Rica – Ministerio di Salud di Costa Rica a adverti diasabra cu e vacuna contra dengue cu a cuminsa na wordo bendi den e pais, ta rekeri di receta medico pasobra ta existi contraindicacion.
“E ministerio di salud a aclarea na e poblacion cu tur tipo di vacuna mester di un receta medico. Locual tambe ta aplica pa e vacuna contra dengue cu ya ta disponibel den boticanan priva di e pais,” un comunicado oficial a indica.
E entidad a splica cu ‘debi cu ta existi contraindicacion absoluto y relativo pa vacunacion cu ta haci ta necesario cu tur persona cu kier vacuna, wordo analisa prome pa un dokter pa asina e indica e vacunacion.”
Ta trata di e vacuna Dengvaxia, desaroya pa e farmaceutico Frances Sanofi Pasteur, cual no por wordo aplica na muchanan menor di 9 aña, personanan mayor di 45, muhenan na estado of den periodo di lactancia, personanan cu ta ricibi kimoterapia, cu ta presenta cuadronan febril of alergico na algun componente di e vacuna.
Segun e cas farmaceutico, e vacuna ta capas di preveni dos di cada tres caso di dengue, ocho di cada 10 hospitalisacion y nuebe di cada 10 caso grave di dengue hemoragico.
E vacuna ta aproba pa e Ministerio di salud di Costa Rica, pero ainda no ta wordo aplica den e sistema publico debi cu un proceso ta den curso di estudio riba su costonan y efectividad.
Datonan di e Ministerio di Salud di Costa Rica, ta indica cu loke ta bay di 2016, a registra por lo menos 19721 caso di dengue, un virus transmiti pa e sangura Aedes Aegypti, cu ta causa keintura y dolor di curpa y cu por causa morto den su variedad hemoragico.
Fuente: NTN24