Den luna di Juli a yega un entrenador nobo pa yuda engrandece e deporte di volleyball na Aruba. Cu un contract di dos aña, Aruba Volleyball Bond a busca un entrenador di exterior pa bin prepara nos seleccionnan nacional femenino y masculino. Den e caso aki a busca un experto for di Hulanda den persona di Daan Kleinbussink.
Pa AVA esaki lo mester bira un stap grandi pa un desaroyo nobo den e deporte di volleyball na Aruba. Como federacion a boga pa un entrenador cu ta dedica su mes 40 ora pa siman pa cu e desaroyo di e atleta y e deporte di volley. Pa duna e deporte un empuhe mester cuminsa traha mas serio mientras e perspectiva lo bira mas grandi bou di esnan cu ta practika esaki. E trabou di sr. Kleinbussink ta riba diferente ramo manera yuda na nos scolnan basico y e maestronan, lo bin cu diferente workshop pa trainer y coachnan.
Tambe e lo yuda e diferente clubnan y traha cu e seccion hubenil. E lo traha un plan pa e desaroyo di nos atletanan na edad. Como federacion AVA lo kier cuminsa propaganda e deporte di volley cuminsando na nos scolnan basico y percura pa e alumnonan aki participa na e volleyball organisa door di uni cu un club. Den sr. Kleinbussink, AVA tin un entrenador experencia mirando cu e tabata ultimo encarga cu e seleccion hubenil di Hulanda.
Un danki sigur na Lotto, e Loteria di Aruba pa medio di Comision di Subsidio cu a yuda subsidia pa trece un entrenador internacional pa engrandese e deporte di volleyball.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.