Diabierna 5 di Mei, Centrale Post ta manda un patruya pa Brazil pa ub problema caminda cu articulonan tabata wordo saca for di cas. Centrale Post a informa e agentenan policial cu e problema aki tin di paar di dia caba ta andando y cu e habitantenan a wordo menasa cu morto.
Na e sitio agentenan ta papia cu e conocidonan di polis “Fucho” y “Iris”, conocido bendedonan di droga. Fucho a declara na polis cu e e ta adicto na “base”. Y cu el a wordo acerca door di un tal “Jose” y cu “Jose” a dun’e un cierto cantidad di base pa bende. Pero Fucho a tuma esaki pa su propio uzo y Jose ya caba tabata tin un paar di dia ta bin e cas pa busca su placa. Segun Fucho, Jose tin un arma di candela den su poder.
Fucho y Iris a declara cu nan tabata drumi na momento cu nan a wordo lanta door di tres homber desconoci y e tres hombernan aki tabata arma. Segun Fucho, el a caba di fia 700 florin for di un señora pa e paga su recibo di awa. Pero e tres hombernan aki a bay cu e placa.
Fucho no tabata sa mas detayenan di Jose, y e no a ripara si e hombernan en cuestion a bin cu auto na e cas. El a keda ripiti cu Jose no mester a lag’e cu e base, ya cu e tabata sa cu Fucho ta un uzado di base. E caso aki tin atencion di autoridadnan ya cu ta trata di e siguridad di e dos personanan envolvi pero Fucho a wordo informa cu polis no ta intermedia den asuntonan di droga. Esaki no ta prome biaha cu Fucho ta haci esaki. E no a keda contento y a bisa di lo entrega keho na Landsrecherche.