Djárason mainta durante entradanan hudisial den kaso “Wilhelmina” a hasi uso di miembronan di e kuerpo di boluntario VKC (Vrijwilligers Korps Curaçao). Esaki pa mantenshon di órden riba karetera públiko. E desishon pa hasi uso di VKC a ser tumá despues di kombersashon entre mando di kuerpo di polis KPC i Landsrecherche Curaçao. KPC ta sufri aktualmente di falta di polis dor ku nan a keda inkorporá den vários investigashon grandi i tabata pa KPC motibu pa konsehá Landsrecherche pa hasi uso awe di VKC. Uso di VKC awe pues a tuma lugá despues di deliberashon di tur partido. Ku KPC ta sufri di tiki pèrsonal ta bo konosí den “driehoek” (Minister di Hustisia, PG, KPC).
Landsrecherche Curaçao a haña por sierto yudansa di diferente departamento di KPC durante e entradanan hudisial . Ta bon pa apuntá i enfatisá ku no tin ningun deskonfiansa entre Ministerio Públiko (OM) i KPC. E relashon entre OM i KPC ta asta perfektamente bon.