KINGSTON, Jamaica – E medayista Olimpico, Usain Bolt a competi pa di ultimo biaha den su propio pais, Jamaica, diasabra anochi, ganando asina e careda JN Racers Grand Prix 100 meter den National Stadium di Kingston.
Bolt a caba e sprint di 100 meter cu un tempo di 10.03, si tiki leu for di su record mundial pa casi ocho aña di 9.58, pero igual cu su prome careda di 100 meter 10 aña pasa.
Despues di e careda, e shelo riba e stadion a ilumina cu un show di vuurwerk. Bolt a bisa cu e tin pens di caba cu su carera na e campeonato mundial na London den luna di Augustus.
“No tin palabra. For di World Juniors, e sosten cu mi a bin ta haya di Jamaica tabata remarcabel,” Bolt a bisa despues, di acuerdo cu e corant The Gleaner na Jamaica. “Mi no por a haci esaki sin mi mayornan, amigonan y mi miho amigo, NJ. Mi kier a gradici Jamaica. Nunca mi a spera esaki. E ta grandi pa mira tur hende a biba cu e momento. E ta mustra cu tur hende a aprecia loke mi a haci y tabata un honor p’ami.”
Mas of menos 30 mil persona a atende e evento, yama “Tribute to a Legend.” Entre esnan presente tabata tey presidente di IAAF, Sebastian Coe y e prome minister di Jamaica, Andrew Holness. David Rudisha di Kenya y Mo Farah di Gran Britania, ambos medayistanan Olimpico, tabata entre esnan cu a atende.
E website di IAAF a cita Coe kende a bisa cu tabata ey nan “simplemente gradici un hende c a cambia e cara di nos deporte, y a encurasha asina hopi hende hoben na nos deporte.” Holness a tweet: “Saludando un leyenda. Danki @usainbolt pa tur loke bo a haci pa e deporte di atletismo y Jamaica.”
E racha di nuebe medaya di oro Olimpico di Bolt no a logra na Januari, debi na un caso di droga cu ta inclui su ex compañero di team di 4×100 meter, Nesta Carter. Nan tabata riba e mesun team den e relay team ganado di e Olimpiada di 2008, cu tambe a inclui Michael Frater y Asafa Powell.
E relay aki na Beijing tabata e comienso di e carera dorado di Bolt den 100, 200 meter y relay den tres Olimpiada consecutivo.
Fuente: http://www.espn.com