Den e ultimo simannan UPP a tuma nota cu diripente tanto sr. Frensel Giel como sr. Hodgson ta haciendo nan maximo esfuerso na purba di tapa e retraso enorme cu tin den e proyecto mafioso di e “vernieuwbouw” di HOH. Ya caba na cuminsamento di 2011 UPP a adverti pa desaroyonan cuestionabel cu ta tumando luga y UPP lo no cansa di keda mustra riba henter e mafiamento cu tin desde principio di e proyecto aki. UPP no tabata keto keto of bira nos cara otro banda, pero nos SI a sigui den e lucha pa mustra con tanto ministernan Visser, Eman, Mike de Meza y Benny Sevinger, hunto cu e muchanan manda den e Infra-team, AIB/SOGA como tambe e Raad van Bestuur di HOH tabata haci nan maximo esfuerzo pa duna e super mafioso Bermello e proyecto aki sin ningun tipo di destaho publico. Ta danki na e esfuersonan aki, cu Gobierno toch a dicidi pa tene un “destaho publico” cu despues a bin resulta den simpelmente fixmento di deal.
A purba di convence sindicato y otro partidonan politico di e mafiamento aki, pero lamentablemente e sindicatonan y 21 parlamentarionan a prefera di bira nan cara y keda keto. Tin un lider sindical di e tempo ey cu awe ta miembro di Parlamento tambe a scoge pa keda keto. Sinembargo awe un biaha mas nos ta haya rason.
Na fin di aña 2015 hopi tabata e discusion riba e cambernan di operacion. Tabata tin reunionnan di Parlamento riba e topico aki y a wordo priminti cu lo haci un investigacion y bolbe Parlamento bek pa por haya un acuerdo pa aumenta e suma disponibel pa e proyecto. Te awe ni fu ni fa. E proyecto di e OK-nan a ser duna na Arrellano siendo cu tin un grupo Hulandes cu a duna un oferta hopi mas abou cu Bermello y Arrellano. E tempo ey ni Giel ni Hodgson no a bin bisa pueblo nada. Minister Schwengle a hasta priminti cu tur hende bay na AIB/SOGA y wak tur cos, ya cu e documentonan ta na disposicion di pueblo. Pero e tempo ey Giel y Hodgson a simplemente ignora un peticion oficial di UPP pa haya e documentonan al respecto. Nan a simplemente scoge pa duna nan “partners in crime” e trabou. Nos tin comprendi tambe cu ningun parlamentario no a pidi pa wak e documentonan. Un biaha mas UPP a mustra riba e mafiamento aki. Un biaha mas sindicatonan y 21 miembro di Parlamento a keda keto.
Awor na Februari/Maart 2017 a bin sali na cla cu tin HOPI reto cu mester a confronta. Papia hopi sin bisa nada concreto. Dicon no ta duna copia di estudionan haci di e tantisimo retonan cu tin? Cuanto e retonan aki lo bay costa nos pueblo? Originalmente loke pueblo mester a bay paga tabata 970 miyon florin, awor parce cu e pueblo Arubano lo mester bay paga mas di 1200 miyon florin of cu otro palabra 1.2 BIYON florin.
E ultimo noticia cu nos a bin tende ta cu lo bay bin full un unidad di Cuido Intensivo nobo, cu NO tabata inclui den e proyecto original. Kico a conduci pa esaki? Cuanto esaki lo bay costa extra? Tabata tin un destaho publico pa esaki? Of atrobe tabata tin un fixmento di contract? Atrobe Bermello a regla cos pa su amiguito Arrellano haya esaki tambe? Y ta mesun Bermello a percura pa cumpra e aparatonan cerca su amigo na Miami? Nos no por imagina nos mes cu ta UPP so ta tuma nota di e mafiamento den dia cla den henter e asunto aki. Y manera tur hende sa cu e placa cu ta wordo horta ta di e fondo di pensioen di APFA, cu empleadonan publico ta hinca aden. Mañan ta e pueblo di Aruba lo bay sinti e consecuencianan ora cu mester cuminisa paga mas cu 30 miyon florin pa aña pa 29 aña largo, en bes di e 1 florin cu ta paga na huur awor aki. Un biaha mas e sindicatonan y e 21 parlamentarionan ta keda keto.
Cu UPP den gobierno tur e bagamunderianan aki di SOGA/AIB y di e mafioso Bermello hunto cu Arrellano lo caba. Cada uno lo mester bay responsabilisa nan mes pa e “ripp off” aki. Y ta di spera cu e Arubianonan hinca den e proyecto aki no bay testigua na fabor di Bermello y contra interes di e pueblo Arubano, mescos cu a sosode tempo di Racetrack. En todo caso UPP si lo no bay keda keto.