Den nos ultimo comunicado UPP a mustra caba con e proyecto di expansion/renobacion di Horacio Oduber Hospital, ta confrontando problema door di e retraso grandi cu tin den e proyecto. Den pasado nos a cuestiona henter e proyecto aki, y cu cada bes nos ta mira cu e headman, Frendsel Giel di AIB, ta keda defende e proyecto aki, uzando diferente argumento fofo, pa hustifica e retraso, y mas cu tur e extra placa cu e proyecto aki lo costa pueblo di Aruba.
UPP a mustra riba e hecho cu Bermello, yuda pa su partner den “crime” Arellano, pa medio di “meerwerk” ta strika miyones extra, e.o. door di e motibo di e “lubida” riba e OK di hospital.
Den pasado tambe nos a mustra cu tin preguntanan serio riba e ehecucion di e trabou di construccion, falta di control riba esaki y uzo di materialnan mediocre y di calidad abou. Nos a puntra tambe pa e rol di ministernan Visser, Schwengle y di Parlamento completo, cu te dia di awe ta warda riba un investigacion cu mester a sosode riba asunto di e operatiekamers/salanan di operacion.
Awe nos por mira cu e.o. Frendsel Giel ta bisa cu e construccion di e OK-nan ta e causante di e retraso. Pero no ta bisa cuanto esaki ta costa. Tambe e ta mustra cu e retraso aki ta pa motibo di e normanan cu a cambia. Pero no por bisa ta cua esakinan ta y kico esaki ta nifica pa e retraso.
Desde e momento cu mi persona na 2011 a cuminza skirbi y cuestiona e desaroyonan entorno e proyecto aki, ya cos tabata casi cla pa duna Arellano sin ningun tipo di destaho publico e proyecto aki. Pues esaki tabata un fixmento di proyecto entre Soga, Infra-team y Bermello. E tempo ey pa hustifica esaki, e mesun Frendsel Giel a bisa cu mester bai internacional pa busca un contratista, ya cu Aruba no tin e experticio aki. Y si un contratista Arubiano kier participa, e mester busca un partner di exterior, pasobra e trabou aki ta exigi un experticio enorme cu Aruba NO tin.
Den nos investigacion haci, nos a bin haya sa cu ni un peticion a drenta departamento di Labor pa trahador di afo. Con esaki ta posibel? Na principio a bisa cu NO tin hende na Aruba cu experiencia den e tipo di construccionnan asina??
Pues, sea Aruba tin hendenan local cu experiencia trahando den companianan local cu no a mester a regala Arellano e proyecto aki, of cu tin un hala di stranhero ta trahando sin cu a pasa e screening necesario of ta trahando ilegal riba e proyecto pa e contratista. Unda nos sindicatonan, gremionan y nos parlamentarionan a keda??? Ta p’esey UPP ta suplica mr. headman Frensel Giel pa publica e nombernan di esnan cu ta trahando den e proyecto aki.
UPP kier a puntra tambe si ya caba a “take care” di e aparatonan medico cu ta necesario pa e edificio renoba aki?
Tambe UPP tin e remarca e silencio grandi cu tin, particularmente di e gremio sindical, den e asunto aki. UPP ta haya esaki remarcabel pasobra SOGA ta usa placa di APFA pa e proyecto corupto aki, cu lo bay costa cu e retraso aki y e “meerwerk” aki, ta bira mas di un biyon florin(1.000.000.000). Un biyon cu gran parti sigur lo wordo hinca den saco di esnan involvi. Ta p’esey e pregunta ta tambe ta na kende SOGA tin cu responsabilisa su mes? Esnan cu ta paga prima no tin derecho pa exigi “inzage” den e bagamunderia
aki? Cua instancia ta controla henter e construccion aki? Preguntanan cu UPP ta pidi pa haya pa asina ey, tanto Parlamento como sindicatonan y probablemente Ministerio Publico haci un trabou di dje.
Pesey tambe UPP den un proximo Parlamento y Gobierno lo percura pa introduci un ampliacion den nos Codigo Civil pa loke ta trata e enqueterecht, tanto di sindicatonan, como di participantenan na un fondo di pension. Ta necesario cu ora participantenan ta mira cu nan contribucion ta wordo hinca den proyectonan corupto y dudoso, nan haya e derecho tambe pa cuestiona esaki y pone p.e. e dirigentenan di un fondo asina responsabel (accountable).