Nos por a bolbe mi henter un fanfaria y un acto di fantocheria na momento cu dialuna ultimo Mike Eman y su gabinete, na momento cu a bin anuncia e inicio di e tercer fase di e proyecto di sondeo di gas rond di Aruba.
Kico ta induci gobierno pa haci un show atrobe, ta dificil pa bisa. Pero esaki parce na prome instante un acto atrobe di populismo, pa bin duna pueblo speranza cu awor si nos ta riba bon caminda. Ora tur hende a spera cu lo a bin pa anuncia cu a haya petroleo of gas, ta bin anuncia cu lo cuminsa e di tres fase. Nos por mira henter un movecion di un gabinete, transmision di Tele Aruba, y paralisacion di Aruba durante ora di trabou, pa tur hende bin tende e bon noticia.
UPP no ta kere cu lo por tin un Arubiano cu no ta contento si enberdad por haya materia prima, manera petroleo y gas bou di nos subsuelo. Nos por a scucha discursonan di euforia unda hasta un minister ta bisa di a resa na Dios Tata, pa nos tin e dicha aki tin e materia primanan aki. A papia tambe di e cooperacion entre companianan Repsol y Total, pero nos no por a tende di e formula di cooperacion entre esakinan y Pais Aruba. Kico na final di cuenta lo ta e beneficionan pa pueblo di Aruba? Y no beneficionan pa un grupito!
Na varios ocasion, UPP a trece dilanti cu nos por wak hopi pais, cu nan momento nan ta rico, no solamente na gas y petroleo, sin di hopi otro materianan prima, cu si no tin reglanan di Good Governance (Bon Gobernacion), e bienestar y probecho lo no toca pueblo, sino un grupito so. Sigur nos bisiña Venezuela ta ehempel den esaki.
UPP ta kere, y na un manera consecuente nos a bin ta mustra riba esaki, cu ta tempo pa nos papia riba e asunto di Bon Gobernacion. AWOR ta un momento husto pa cuminsa na introduci reglanan estricto al respecto. Pakico ta importante esaki? Pasobra djis magina cu na momento cu haya petroleo y/of gas, nos no regla Bon Gobernacion awor aki, tur hende lo lubida cu tin corupcion, mal gobernacion, nepotismo, etc. Pasobra na momento cu ta bay tin placa na abundancia tur cos ta wordo subsidia, tanto cos bon como cos malo. Lo tin un bienestar y prosperidad ficticio, pero sin un desaroyo real y duradero. Esaki lo ta asina, te ora cu no tin placa mas pa saca e petrolio of gas. Peor ainda ora cu ta sinti cu gobernantenan mes ta hinca nan mes den e tipo di negoshinan aki. Pesey UPP ta kere cu aspectonan di Bon Gobernacion mester wordo trata awor. Esey nos a bin ta urgi caba for di basta tempo, desde prome cu eleccion di 2013, na nos parlamento.
UPP ta kere cu banda di e aspecto di Bon Gobernacion, lo mester regla tambe e aspecto di beneficio cu eventual explotacion di gas y/of petroleo lo trece pa caha di gobierno. Mester percura pa e beneficionan wordo reparti husto pa e pueblo di Aruba. Hunto cu e reglanan di Bon Gobernacion lo percura pa evita cu e reparticion ta bay pa un grupito so of ta bay den proyectonan descabeya. Y den esaki nos a mustra
na varios ocasion e ehempel di Dinamarca y otro paisnan Nordico. Aki tur loke ta procedente di ganashi of entrada di loke ta bou subsuela di e pais, ta wordo poni den fondonan cu ta wordo dirigi riba desaroyo real y bienestar y prosperidad di e pueblonan. Nos a yega di mustra caba cu p.e. entradanan for di esaki, mescos cu loke ta e refineria (blender), mester bay p.e. den un fondo di enseñansa, ya cu esey ta yabi di nos bienstar den futuro. Y asina por regla pa e beneficionan yega di berdad na e pueblo, y den un forma husto. Pero un biaha mas ta na nos pa haci esaki posibel cu sosten di nos pueblo, ya cu nos ta mira cu nos parlamento no kier atende e asuntonan aki.