Den un intervista cu e headman, Frendsel Giel, a tene recientemente encuanto e proyecto corupto di expansion/renobacion di Horacio Oduber Hospital nos a bin tende cu tin un retraso den e proyecto aki. Dicon UPP no ta nada sorprendi? Facil. Ta for di un principio nos a bin ta alerta nos pueblo cu, debi cu Bermello ta meti den e proyecto aki, sigur e prijs cu Aruba lo mester bay paga na final di cuenta lo ta mucho mas halto pa motibo di e tantisimo “meerwerk” cu Bermello lo introduci. Y esaki den colaboracion cu Arrellano cu ta contratista amigo di Bermello.
No ban lubida cu e compania Frances, cu a “bid” 45 miyon florin menos riba henter e proyecto a duna e garantia cu lo NO tin ni “onvoorziene kosten” ni “meerwerk”. E ora ey, e pregunta grandi ta, dicon AIB y SOGA toch a prefera deal cu Bermello, sabiendo cu ta trata di e mesun compania cu a hit Aruba pa mas di 35 miyon dolar den e proyecto fantasma di Racetrack? Un plan macabro di entre otro Bermello, cu pa colmo a haya ayudo di 3 persona di Aruba di cual 2 ta den politica ainda, esta Mike de Meza y Glembert Croes. E dos politiconan aki a testigua na fabor di Bermello y contra interes di Aruba y esey a pisa hopi den e veredicto di e hues cu a trata e caso aki. Esaki a costa nos pueblo mas di 35 miyon dollar.
Bermello hunto cu Arrellano, kende a haya e proyecto aki via un fixmento di e deal aki, ta “partner in crime”!!
Lamentablemente cu nos alerta a cay den un bashi. Nos a manda un dossier completo pa tur sindicatonan na Aruba y nos a reuni cu varios tambe, pero tur a keda keto y laga cos bay. Awe nos mes por tende cu un biaha mas UPP ta haya rason. Nos a bisa e tempo ey cu “meerwerk” ta sinonimo cu e mafioso Bermello, pero Frensel Giel cu su gang di Alibaba no a worry. Pero ata aki, no solamente “meerwerk”(cu kiermeen mas placa), pero tambe un retraso cu alabes ta nifica mas placa. Placa pa ken? Placa cu ta bay directamente den saco di esnan involvi den e proyecto corupto aki.
Ora cu e otro headman den e Proyecto aki, esta Alex Schwengle den Parlamento a bisa cu tur hende por bay SOGA y haya e dossier ter “inzage”, UPP a haci un peticion asina pa haya “inzage” den TUR dossier cu SOGA tin riba e proyecto aki. Pero nada! Ta conoci caba cu e minister aki ta gusta priminti. Pero cumpli ta un palabra malo p’e, y manera ta conoci Parlamento den su totalidad ta na soño. Nos por a scucha na comienzo parlamentarionan di oposicion menaza cu lo bin cu un encuesta Parlamentario. Pero eynan tambe nada.
Anto awe nos ta haya e noticia cu lo tin un retraso.
Unda e investigacion cu e mesun Alex Schwengle a bisa cu a ser haci entorno e OperatieKamernan ta?? No ta manera un macho crioyo e tabata insinua cu e.o. dr. Jaime Falconi y e director financiero ta responsabel? Dicon no ta pone nan para responsabel pa esaki?? Of a bin sali afo cu ta e mesun Mike Eman, Richard Visser y Mike de Meza a bay di acuerdo cu e OK-nan no mester wordo inclui den e proyecto?? Nos ta reta e Alex Schwengle pa publica e rapport aki.
Ta e headman Frendsel Giel mes a bisa cu e construccion di e OK-nan ta un di e causanan pakico tin un retraso. Dicon no ta bisa cuanto e retraso aki lo bay costa?
Den mesun intervista Frendsel Giel ta bisa cu e retraso ta tambe pa motibo di e normanan cu a cambia. Ta cua ta e normanan cu a cambia asina drastico cu por a causa un retraso?? Of esaki ta djis un “cheap-shot” di e defensor di e Gobierno aki y di e proyecto corupto aki? Nos ta pidi pa suministra e lista anto di e normanan cu a cambia y cuanto esakinan ta costa. Di e manera aki na un manera transparente nos por saca afor con e pueblo a wordo tuma haci cu e proyecto di hospital aki, cu pa generacionnan nos pueblo lo mester bay paga pe.