Partido UPP a adverti caba pa loke ta sosode cu dump na Parkietenbos, parce cu tur cos ta cla caba y cu awor ta solamente mester warda pa e telon cay pa Serlimar. Sigur ta cu e situacion cu a maniobra e dump di Parkietenbos aden desde e prome dia di e gobernacion aki, esta na november 2009, te cu awe, a conduci na e situacion cu ta existi.
Como minister responsabel e tempo ey Booshi Wever a percura pa paga e candela y percura pa cuminsa cu e proceso di tratamento y procesamento di sushi y desperdicio. Esaki na un forma mas responsabel y cu na final lo a mester a sanea e dump. Pa 7 aña largo Gobierno di Mike Eman, cu Benny Sevinger como e berdugo principal, a percura pa boycotea dump y laga esaki sangra muri.
Hunto cu e boycot aki, guia pa un capricho pa yuda financiador di campaña, a pone e vecindario bolbe sufri pa tempo largo, parando durante 7 aña largo tambe e proceso di saneamento real di nos dump. Mientrastanto awor ta crea un situacion di incertidumbre pa e trahadornan di Serlimar, door di no ta transparente. Tur esaki ta pa logra e cierre definitivo di dump y cumpli cu e soño di Aruba Bunita N.V.cu bou di Henny Eman no a cristalisa, prome cu 2001.
Di loke UPP tin comprendi cu henter e plan diabolico aki lo ta e ultimo fase di loke ta e exterminacion completo di Serlimar. Ora cu nos a kere cu a bay over na cobra pueblo 35 florin pa e servicio di Serlimar y pa mehora e planta aki, Mike Eman a uza e fondonan aki pa paga e contratistanan canto di caminda y pa haci politica cu su programa di “Bo Bario”. Pues e fondonan a wordo aloca di otro manera pa core campaña, mientras cu esey mas bien mester tabata un obligacion directo di gobierno. Pues gobierno ta esun cu directamente for di su presupuesto mester a paga p’esaki, ya cu ta un servicio Serlimar ta duna, tambe na Gobierno.
Cu esaki ta un plan diabolico ta keda demostra tambe den e hecho cu e gobierno di “dialogo” ningun momento a involvi e trahado, e sindicatonan y aparentemente ni gerencia. Ta via di social media e trahadornan a haya sa di e plannan aki, esta loke Gobierno su vision pa cu Serlimar ta entrante Januari 2017. Aki atrobe Mike Eman a subi e cabay cu yama “populismo” y hunga mooi weer cu un fundacion di e bario di Parkietenbos. Un fundacion cu a colabora cu e compania desde principio y cu tabata fulmina contra e minister di e tempo ey, esta Booshi Wever y awor kier bin hasi como sifuera cu nan a logra algo, siendo cu nan ta parti di e problema. Esta cu cueste loke cueste ta sera landfill na Parkietenbos, pero na mes momento, “twee vliegen in een klap”, duna e compania poderoso pa tuma henter e sector di maneho di desperdicio over.
UPP kier a adverti pueblo pa e palabranan bunita di Mike Eman den e caso aki. Atrobe yen di papiamento bunita, pero al final nos tin di tene cuenta, cu nos ta pone den man di un compania, sin un destaho publico, e maneho y ehecucion di recohemento y procesamento di sushi aki na Aruba. Aki UPP kier a mustra riba e hecho, cu ya nos waf na Barcadera ta den man di un compania cu su tentaculonan y su influencia ta bay te mas aya, esta e compania di poderoso di Meta Corp y Eduardo de Veer, cu ta dicidi kico ta pasa riba waf.
Nos por a mira aumento di gastonan di container cu ningun hende no por haci nada pa wanta esaki. Recientemente tambe nos por comprende cu tur e barkitonan cu ta trece fruta etc. for di tera firme pa nos, awor nan lo tin di bay paga 75 florin pa ora, na momento cu nan para mas cu 12 ora den waf di Barcadera. Esaki na su turno por bay na aumenta prijsnan di productonan cu ta drenta cu e barkitonan aki. Pues usuarionan di e waf ta na merced di un solo compania.
Hustamente esaki nos mester tene cuenta cu ne na momento cu recohemento di sushi ta bay den man di un solo compania, den man di un famia poderoso aki na Aruba, cu su meta ta pa haci ganashi. Pues na momento cu e compania aki kier e por bay na aumenta e prijs di recohemento di sushi. Kende ya tin ganashi riba e sushi na momento cu nan bay produci gas pa WEB Aruba N.V. of pa exporta esakinan pa exterior. Dicon no por a duna Serlimar e oportunidad aki?
Pero ta scoge awor pa Serlimar y su trahadonan sangra muri, ya cu trucknan di sushi ta bay directamente na Ecotech, mientras cu e servicio di “pisamento” cu tabata trece alrededor di un miyon florin pa Serlimar pa luna aden tambe lo cay afor. Aki tambe e compania Ecotech lo tin un beneficio di no tin nodi di bay paga esaki mas na Serlimar. Cu otro palabra un vision lucrativo di Mike Eman pa loke ta Parkietenbos na bienestar di un famia aki na Aruba. Mientras tanto e trahadornan por wel si sigui pena.