Diaranson 15 di februari ta e ultimo dia pa ciudadanonan automobilista paga e prome mita aña di e impuesto riba vehiculo. Pa cuminsa e maneho cu minister Bermudez a bin cune, despues cu e chauffeurnan di truck a demostra algun siman pasa, no ta duna muestra di tin compasion tampoco cu esnan cu tin number di auto cu plachi “A”. UPP ta condena henter e procedimento aki di parti di Gobierno y Parlamento cu manera ladron den anochi a pasa e ley di “motorrijtuigbelasting” cu a crea y ta creando asina tanto caos y consternacion den nos comunidad.
Ta incomprendibel con dia 28 di November 2016 ta publica den “Afkondigingsblad un ministeriële beschikking riba kentekenbewijzen en motorrijtuigbelasting”, unda cu den articulo 4 ta stipula ainda cu tin 4 periodo (kwartaal) di pago y dia 19 di December ta pasa un ley y cu ta wordo promulga dia 28 di December 2016, cu ta papia full un otro cos. Kico tabata e necesidad aki asina urgente? Falta di placa? CAFT?
Loke ta mas criminal ta cu e cambio di dia 19 di December den Parlamento, anuncia dia 28 di December 2016, y presenta den un conferencia di prensa den di dos siman di Januari 2017, ta kier a pone pueblo dilanti un situacion di sino fono. Paga prome cu 31 di Januari of ta haya un boet administrativo, igual na e suma di number di auto. UPP ta kere cu mester bin un proteccion pa e ciudadano ora cu Gobierno kier bin cu cambionan drastico y liher pa asina purba na saca placa den un forma rapido. Mester ancra den nos leynan, den nos constitucion, cu un Gobierno no por bin cu cambionan drastico riba un termino corto perhudicando e ciudadano. Goberna ta premira y anticipa. Gobernacion ta wordo haci den nomber di pueblo. Pesey, si ta existi e necesidad pa cambio mes, lo ta na su luga pa Gobierno haci esaki drenta na vigor na un fecha di un aña despues y no di algun siman despues. Den e caso aki poni den gazeta oficial di Gobierno riba 28 di December y ta drenta den efectivo riba 1 di Januari 2017. Pues den 3 dia di tempo. Esaki ta un crimen, ya cu bo no por a anticipa y prepara e ciudadano pa e por cumpli.
UPP ta kere cu mester keda cu e sistema di kwartaal, pero cu lo mester bin otro tipo di control y sancionnan pa esnan cu no ta cumpli. Tambe mester pensa na cambia e sistema di cobranza, pa uno directo.
UPP ta haci un apelacion na gobierno di Aruba y na minister Bermudez y Parlamento pa mira con por duna un alivio pa loke ta pago actual cu ta tumando luga. Te cu ayera, ta miles di hende tin cu no a paga y rijnan largo ta descurasha hende. Un cambio ta necesario for once and for all den esaki.