Diamars, 28 di Maart, nos comunidad a wordo sacudi cu e noticia cu “inval”-nan na cas di varios ciudadano a tuma luga. Un accion na unda tanto e poder hudicial como e poder ehecutivo a coopera cu otro. Y un di e casnan cu a ser bishita, ta esun di un minister. Mesora nos por a tuma nota di reaccionnan riba medionan social.
Tin hende ta di hubilo y otro ta tristo. Ami sigur lo no bay gosa cu dolor di ningun hende, ni tampoco bay husga ningun hende. Sinembargo nos no por perde for di bista, cu nos di UPP a bin ta mustra na varios ocasion loke ta pasando den henter e asunto di permisologia, incluso loke tabata pasa cu e “ontheffing” cu tabata ser duna na companianan pa trabounan, pa cual tin hopi Arubiano disponibel, cu por haci e esaki.
Nos ta contento cu porfin investigacionnan ta wordo haci y ta di spera cu e no keda na esaki so, sino e ta mustra cu tin tipo di descriminacion. Pasobra e minister concerni hamas por a haci loke e ta wordo acusa di dje sin ayudo di su colega Benny Sevinger y sin conocemento di particularmente Mike Eman.
Awor falta pa sigui pa e otro parti di e cadena, esta e otorgamento di e permiso mes. Nos a publica varios carta di “ontheffing” na unda ta aparece firma di tanto e minister cu ta wordo investiga awo, pero tambe di Benny Sevinger. Aki tambe nos a haci denuncia oficial na OM y nos a manda carta pa TUR partido politico, instancia y gremionan riba e corupcion den esaki. Y nos a menciona nomber di Radhi Kan y Mario Wever. Ta di spera cu OM no laga e investigacion na e “ontheffingen” so, pero bay pa esnan cu ta “wheel & deal” den Dimas y cu den nomber y/of riba peticion y instruccion di Benny Sevinger ta fix cos pa hende. E tempo ey nos nunca a haya reaccion di ningun partido politico, probablemente nan ta pensa riba votonan di famia di esnan cu a ser yuda pa un famia di nan haya un permiso cu si por vota.
Pues UPP ta contento cu OM a haci y ta haciendo investigacion den e asunto aki.
Pero nos lo ta di hubilo grandi dia cu partidonan politico y Pueblo realisa cu tur e casonan aki por a ser evita si e reglanan estricto di Good Governance tabata “in place”! Dia cu kita e posibilidad cu un politico por haci su mes culpabel na “machtsmisbruik”, manera OM a menciona ayera, un minister lo pensa hopi bon prome cu e pensa di complace cu hende y ricibi placa pa esaki.
Y con Good Governance por logra esaki? Nos kier djies mustra riba 4 aspecto di Good Governance en general.
E prome ta TRANSPARENCIA. Pues e minister concerni mester publica tur e “ontheffingen” cu el a haci, y mustra cu e procedura cu el a sigui pa yega na e “ontheffing” ta conforme nos ley- y reglanan. Y den esaki ta importante pa e hustifica, argumenta y motiva su desicion.
Si e no haci esaki manera cu mester ta, cualkier ciudadano mesora por acudi na e OMBUDSMAN y entrega un keho. Esaki na su turno mester actua mesora y exigi di e minister concerni pa e responsabilisa (ACCOUNTABILITY) su mes loke el a haci. Pues e ciudadano no mester warda un aña pa algo por ser haci.
Den e caso cu por ehempel e minister hinca den su cabes mes cu por keda sin ta transparente, un empleado publico lo por bay cerca e mesun Ombudsman pa entrega un keho. Awo hopi ambtenaar no ta hacie pasobra e tin miedo di represaya. Ta pesey ta indespensabel pa introduci leynan cu ta duna proteccion total na e asina yama “KLOKKENLUIDERS”.
Cu e 4 aspectonan aki so, nos por logra cu e minister su man ta mara y cu e lo pensa su mes mil un biaha prome cu e bay haci su mes culpabel na tipo di actonan criminal asina. Aki nos kier a ilustra con facil e ta pa trece e cambionan necesario pa nos por garantisa e pueblo cu su interes ta wordo bon sirbi y proteha.
E dia cu nos por logra introduci e reglanan aki, e dia ey, SI UPP lo ta di hubilo y nos ta sigur cu e Pueblo tambe lo ta di fiesta, pasobra e Pueblo lo ta feliz, pasobra e benificio lo bay directamente pa e Pueblo, mescos ta e caso na e paisnan Scandinavo cu tin e reglanan estricto di Good Governance “in place”!
Dicon ainda otro partidonan politico no kier esaki, pa UPP ta un misterio.
Ta pesey UPP ta bisa “CUBO so nos por logra, P’ABO por ta feliz y PA ARUBA por ta prospero atrobe y nos por mustra mundo henter cu nos ta merecedor di nos Status Aparte.