Diamars awo dia 25 di October Ministerio di Enseñansa conhuntamente cu Departamento di Enseñansa lo tene un anochi di informacion pa tur studiante cu tin e interes pa bay studia na Merca of Canada. E anochi di informacion lo tuma luga na e Auditorium di EPI y lo cuminsa pa 7:00 or di anochi.
Durante di e anochi di informacion lo duna informacion general riba studia na Merca y Canada y lo enfoca riba e estado y universidadnan na e paisnan menciona cu cual pais Aruba tin un areglo special pa nos studiantenan Arubiano. Ta trata aki di entre otro e estado di South Carolina cu ta inclui University of South Carolina (USC) y Coastal Carolina University, Seneca College na Toronto Canada y otronan cu ta den proceso pa wordo formalisa. E anochi aki lo conta cu presencia di sr. Frank McClary, kende ta Director of International Admissions & Recruitment di University of South Carolina cu lo ta na Aruba pa duna informacion na tur studiante cu ta interesa pa studia na e Universidad aki. Despues di e presentacion di sr. McClary di USC nos lo tene un skype in cu 4 studiante Arubiano cu ta actualmente na USC cu lo comparti nan experiencia. Aruba College Fair Foundation tambe lo ta presente pa duna informacion riba e posibilidadnan di beca pa estudio y Departamento di Enseñansa lo duna informacion riba e opcionnan di financiamento di estudio.
Tur studiante cu ta interesa pa bay studia na Merca of Canada ta keda cordialmente invita pa e anochi di informacion. Durante di e anochi di informacion lo duna tur e informacion relevante cu studiantenan tin mester pa por bay studia na Merca of Canada y tambe lo tin espacio pa pregunta. E anochi di informacion lo tuma luga diamars dia 25 di October cuminsando pa 7:00or di anochi na e Auditorium di EPI.