UTRECHT, Hulanda- Universidad di Utrecht pa di 15 biaha ta wordo nombra e miho universidad di Hulanda, segun e Academic Ranking of World Universities anual di e Universidad di Shanghai, publica diamars.
Riba ranking mundial, Utrecht ta para ariba number 47. Un aña prome e tabata para ainda riba nr. 65. Rijksuniversiteit Groningen, e di dos universidad mas miho di Hulanda, a bula 13 puesto pa asina stop na 59. Universidadnan di Leiden (88) y Rotterdam a subi di puesto ariba e ranking di 500 universidad.
E lista ta encabesa pa e universidadnan Mericano Harvard y Stanford. Na di tres luga ta haya e universidad Britanico Cambridge. E top 100 di e aña aki ta wordo domina door di un total di 47 universidad Mericano.
E ‘ARWU-ranking’ anualmente ta studia mas di mil universidad. E miho 500 nan bin ariba nan lista. E Academic Ranking of World Universities, manera e lista ta yama oficialmente, ta wak hopi e resultadonan investigativo y e cantidad di biaha cu’n colaborador di e universidad a aparece den revistanan cientifico of e cantidad di biaha cu nan a wordo cita den un revista cientifico. Tambe e cantidad di premionan, manera Premio Nobel of e Fields Medal cu colaboradornan y graduadonan di un universidad ta haya, ta conta hopi.
Fuente: http://www.msn.com/nl-nl/nieuws/