Tur aña tin studiantenan cu ta caba nan estudio y ta scoge pa sigui nan estudionan universitario den exterior. Esaki ta debi cu no ta tur studiante kier sigui nan estudionan na Aruba. Sr. Glenn Thode, rector di Universidad di Aruba.
Sr. Thode ta splica cu no ta tur studiante kier studia e estudionan cu Universidad ta ofrece. Esaki ta haci’e un situacion fastioso pa e studiantenan cu kier keda na Aruba. A cuminsa pa expande e posibilidadnan di estudio. Tin proyecto cu Universidad ta trahando hopi aña riba dje pa expande y bay den e areanan di tecnologia. Universidad di Aruba a drenta den colaboracion cu Universidad di Leuven, considera como un di e universidadnan mas avansa na Europa riba e tereno aki. Conhuntamente cu Universidad di Leuven lo diseña un proyecto den cual lo introduci e disciplinanan tecnologico. Pero esaki lo wordo acerca di un forma diferente cu locual universidadnan den exterior tin custumber di haci. E idea ta pa mustra con pa uza tecnologia pa adapta e sociedad pa bira un sociedad cu ta enfoca mas riba sostenibilidad. Firmamento di un acuerdo pa financiamento cu Europa lo tuma luga e fin di aña aki si tur cos cana riba bon caminda. Asina lo ta cla pa desaroya e disciplinanan nobo aki. Esaki ta pa e studiantenan cu kier keda na Aruba y kier eherce un estudio den tecnologia pa yuda nan pais pa bira un comunidad mas moderno y sostenibel.
Segun sr. Thode, e programa lo ta un Bachelor Program y despues lo sigui cu un Master’s Program. Cu ayudo di disciplinanan di Universidad di Leuven, nan ta trahando riba e trayecto di PhD. Pronto lo capacita Universidad di Aruba pa poco poco traha riba e trayecto pa forma e linea di disciplina di desaroyo aki pa studiantenan local.