United y Brazil Jrs ta parti punto den play-off Division uno

0

Dialuna 4 di juni 2018 a sigui e play-off di Aruba su Futbol Division uno, unda cu den Compleho Deportivo Guillermo P Trinidad a topa otro e actual lider di e play-off aki cu ta Brazil jrs contra di United cu ta na di dos logra.
Brazil jrs den dos salida cu dos victoria cu un total di 6 punto, y na e otro banda United cu ta na di dos logra cu den dos salida cu un total di 4 punto, cu un wega gana y un wega empata. Tambe un wega pendiente cu a wordo cancela cu e propio Brazil jrs.
United den e wega aki a bin por la goma caminda nan a sali brabo pa bay cas cu e tres puntonan disponibel. United tabata mas den atake y a crea mucho mas oportunidad cu nan contrincante. Na e otro banda Brazil jrs no tabata e ekipo cu nos conoce manera nan a hunga nan ultimo wega.
Den un contra atake di e ekipo di Brazil jrs nan ta haya un penalty na di 12′ di wega, caminda cu e capitan Owen van der Wijne #9 ta logra habri e marcado pa Brazil jrs bay ariba 1-0.
United ta sigui pone presion y tabata na di 32′ di wega caminda cu den un atake bala ta dal den man di un defensa den doelgebied caminda cu referee ta pita penalty. Michael Molinares #7 ta cobra cu exito pa empata e wega na un gol. E prome 45′ nan di wega ta finalisa den un empate na un gol.
Den e segundo tempo ambos ekipo ta sigui presiona , pero no por a score. E hungado #15 di Brazil Jrs ta ricibi carchi geel pa un hugada poco bruto. Na di 75′ di wega e hungado #12 di United ta wordo expulsa for di wega. Final di e partido United vs Brazil jrs 1-1.
E tabla di posicion ta keda cu Brazil jrs ta keda na prome logra cu 7 punto,
sigui pa United cu 5 punto , na di tres logra FC Porto cu 4 punto y sigui pa RCS cu 0 punto.
Proximo wega lo ta Diamars 5 di juni den CDGT FC Porto contra di RCS pa 8or pm.

Comments

comments