Diamars atardi Minister President Mike Eman a ricibi bishita importante di representantenan di Nacionnan Uni. Ta trata di Kenroy Roach, Consehero Regional di e United Nations Development Programme relaciona cu e Sesion Inaugural di e Centre of Excellence cu ta tuma luga actualmente na Aruba. E ehercicio pa paisnan conoci como SIDS (Small Island Development States) ta forma parti di e Green Week of Sustainable Initiatives.
Na su salida, Roach a elogia e papel cu Aruba ta hunga den e desaroyo di otro islanan similar. “Aruba ta un partner fuerte den UNDP,” asina representante di Nacionnan Uni a declara. Durante e reunion a papia, entre otro, riba e vision y futuro di energia na Aruba y con esey por wordo comparti cu otro SIDS.
“Nos ta impresiona cu e esfuersonan cu ta wordo haci na Aruba den e transicion pa un economia totalmente dependiente di energia renobabel,” asina Roach a comenta. E representante di UNDP ta pensa cu awo ta momento pa resalta e experiencia di Aruba na un nivel internacional y mey mey di forumnan politico pa comparti nos ehempel cu otro gobiernonan.
Roach a splica cu pa loke ta trata Center of Excellence (CoE) na Aruba ta un plataforma cu a sali como resultado di e Conferencia di SIDS na Samoa na 2014 y cu a keda estableci oficialmente durante Green Conference 2015, esaki ta hayando su forma cada bes mas. E tin confiansa den e ekipo y institucionnan cu ta envolvi. “Un bes cu e plataforma virtual ta estableci y e informacion ta formula den un manera cu ta mas simpel y practico tanto pa gobernantenan, sector priva y organisacionnan social, solamente lo keda crece. Nos mester percura cu e Center of Excellence, e plataforma y e trabou cu nos ta haciendo cu Universidad di Aruba ta relevante, cu e informacion ta facil pa compronde, presenta di un manera cu paisnan por tum’e y en verdad haci uso di dje.”
Pa e encuentro bilaterial aki, Roach tabata compaña pa Richard Blewitt kende ta e Representante Permanente di UN pa UNDP. Ambos a keda ricibi pa Premier Eman den su oficina na Edificio di Gobierno. Tambe tabata presente Consehero di Gabinete Mike Eman II y ex funcionario di Nacionnan Uni, Jocelyne Croes, ademas di Rosemary Lall, Programme Officer encarga cu Energia, Medio Ambiente y Maneho di Desaster di oficina di UNDP Trinidad & Tobago.