Den Haag, HULANDA- Awo cu resultadonan di eleccion na Hulanda ta conoci, ta tempo pa tuma despedida di e Tweede Kamer bieuw y esaki a sosode diamars cu speech di tur e 71 miembronan cu lo no bin bek den Tweede Kamer.
“Tuma despedida ta forma parti di politica, e electorado a papia”, segun Presidente di Tweede Kamer Khadija Arib, cu a dirigi e sesion di despedida. El a dirigi su mes personalmente na cada un di e 71 coleganan, di esun cu menos tempo den Tweede Kamer, (Job Geselschap, VVD) te cu esun cu mas tempo den Tweede Kamer (Harry van Bommel, SP).
Diesdos miembro di Parlamento a haya un cinta for di Rey WIllem Alexander: Betty de Boer, Lea Bouwmeester, Brigitte van der Burg, Yasemin Çegerek, Angelien Eijsink, Lutz Jacobi, Anouchka van Miltenburg, Daniël van der Ree, Karin Straus, Grace Tanamal, Roos Vermeij y Agnes Wolbert.
E cambio pa PvdA ta nifica un decepcion profundo, ya cu nan a perde 29 asiento. Parlamentarionan experiencia manera Lutz Jacobi (PvdA) y Paul Ulenbelt (SP) ta tuma nan retiro a base boluntario, pero pa Ahmed Marcouch (PvdA) y Jacques Monasch (Nieuwe Wegen) esaki ta un decepcion pa nan cu nan no por a sconde.
E periodo di e Tweede Kamer actual a cuminsa dia 20 di September 2012 y lo termina pa mei anochi. Mayoria di e miembronan di Parlamento a sinta e periodo completo, pero tabata tin parlamentarionan di VVD y PvdA cu a drenta e gabinete Rutte II dia 5 November 2012 .