Un señora Hulandes su amor pa Aruba te hasta despues di su morto

0

Jannie de Hoop tabata yiu di Lijkele de Hoop, hefe di DOW di 1944 pa 1949. Den su posicion Sr. de Hoop a haya e cas na Lagoen caminda awor tin Accountant’s Dienst y famia de Hoop tabata nos bisiña na Lagoen pa tur e tempo cu nan a biba na Aruba. Tur tres ruman a bay e mesun scol cu nos, Julianaschool. Despues cu Sr. de Hoop a pensiona di DOW, el a keda Aruba y traha pa empresanan priva. Entre tanto, Jannie a namora di e polis Fokke Haakma y na 1951 nan a casa den un ceremonia masha bunita den Iglesia San Francisco. No mucho tempo despues Jannie cu Fokke a emigra pa Nieuw Zeeland caminda mi tabatin e placer di bishit’e tempo cu mi a biaha pa Australia. Durante mi bishita Jannie a recorda con felis el a biba na Lagoen y varios bes el a expresa su amor pa Aruba.

Jannie su amor pa nos Aruba no tabata fingi; di berdad el a stima Aruba masha. Mas di mei siglo despues di a sali di Aruba, bibando e otro banda di mundo, Jannie a fayece, pero recordando e añanan feliz cu el a biba na Lagoen, prome cu el a muri el a pidi su yiunan plama su shinishinan den e awanan di Aruba. Ora nan a puntra mi na unda nan por bay, mi a sugeri den Lagoen di Playa caminda mi tambe ta spera di termina.

Un poco prome cu 11 or di mainta dia 8 di mei, seis miembro di su famia a yega Aruba den e crusero “Celebrity Equinox” cu e shinishinan pa cumpli cu Jannie su ultimo deseo: Su yiu muhe Jan cu su casa Geoffrey Potter y nan yiu Christie; e otro yiu di Jannie, Edie Haakma-Swney, y Lieke Raspe, subrina di Jannie y su casa Cees Meeusen. Di waf nan a cana bay pa e banda pazuid di Lagoen caminda nan a habri e urna cu tabata contene un saco cu e shinishinan. Un pa un, cada miembro di famia di Jannie, cu lagrima den nan wowonan y un oracion silencioso, a plama un man yen di e shinishinan te ora cu e saco a keda bashi.

Cu un ceremonia simpel, e famia a cumpli cu e ultimo deseo di Jannie pa expresa e amor cu e tabatin pa Aruba den bida y den morto, un amor cu ni distancia ni tempo a kibra.

 

Scirbi pa Clyde Harms

Comments

comments