Loke ta pisa hopi den nos comunidad y cual lo wordo evalua den e prome board meeting di Camara di Comercio, pa haci algo grandi pa San Nicolas. Sr. Ernst Mohammed ta amplia.
Den e reunion di directiva di Camara nan lo evalua con nan por haci algo grandi pa San Nicolas, y lo trece esaki dilanti pa gobierno pa yuda San Nicolas pa bolbe bek na e San Nicolas di antes. Rond di Citgo ta reina un incertidumbre y Sr. Mohammed ta bolbe enfatisa cu un otro refineria lo no ta un solucion. Refineria di Aruba ta hopi bieu y e ta birando obsoleto. Esey ta birando un di e puntonan, unda cu tur hende ta buscando otro alternativanan. E ora no mester busca fosiel gas.
Poniendo esey un banda, toch ta wak cu e tereno ey por wordo busca pa algo, cual Sr. Mohammed no por profundisa den dje awo, pero si tin un solucion. Busca solucion den sustainable energy. Aki ta caminda cu Camara tin un plan, pa haci di e luga ey algo diferente, sostenibel, cu no ta hotel. Aruba su spending capacity a pasa su limite caba. E parti social a bay atras, y hotel no ta e solucion.
Mas den aña Camara di Comercio lo divulga e plan pa haci San Nicolas den algo sostenibel pa a largo plaso. Y no algo cu den corto tempo lo bira un problema atrobe. Esey no ta e solucion pa San Nicolas. E ta bay tuma tempo y trabao, pero ta bay tuma un actitud di “yes we can”, cu si nos por, segun Sr. Ernst Mohammed, director di Camara di Comercio.