Un recuerdo: Celebracion di aña di La Reina na 1957

0

Como parti di celebracion di Aña di La Reina 1957, Aruba Sports Car Club a organisa un grandioso pustamento di auto riba e pistanan di Aeropuerto Prinses Beatrix. Coredornan di Corsou tambe a tuma parti. Tabatin masha interes den e careda. Un corant a menciona cu tabatin mas di 3500 mirones. Te na Eagle por a scucha e vroom vroom di e autonan.

Mi ta corda e dia basta bon ya cu mi tabata conoce varios participante. Francis Ecury y John Merryweather tabata amigonan na Julianaschool. Dr. Groenhart, tempo cu el a biba na Aruba, tabata internista di mi señora. Un anochi un aña prome mi a yam’e pa un emergencia y apenas mi a pone telefon abou el a presenta na nos cas na Eagle den un auto masha bunita cu tabata parce un tubo largo, liso y hopi abou, un Austin-Healy 1955 cu a impresiona mi pa su semblansa na un hotdog gigantesco. Un otro participante cu mi a conoce ta van Glabbeek, kende un tempo tabata Director di e Departamento di auto di Aruba Trading Co. na Dakota. Mi tabata conoce tambe Al Casali, un Mericano di Lago, kende tabata den e grupo di programador di e IBM650 di cual a mi tabata forma parti.

E prome careda tabata di autonan te cu 1,500 cc. Van Glabbeek a gana esaki cu su MGA cora cu tabata hala masha atencion. Francis Ecury a yega den di dos lugar, apenas 3 seconde despues y den di tres luga John Meryweather. Mescos cu Van Glabbeek, Ecury y Merryweather tambe a core den MGA. E di dos careda tabata pa autonan di mas potencia cu motor te di 3000 cc y Dr. Groenhart den su Austin-Healy a gana esaki ampliamente. E di dos y tres luga tambe a wordo gana pa coredonan di Corsou. E ultimo careda tabata di tur auto pero cu handicap y a resulta hopi preta. Na final tabata Meryweather cu a bira ganado y van Glabbeek a yega na di dos luga. E coredor Labus, tambe di Corsou a yega di tres. Como e unico ganado Arubiano, John Merryweather tabata e heroe di dia y pa hopi tempo e caredanan di Aña di La Reina tabata e topico di combersacion rond di Aruba.
Skirbi pa Clyde Harms