TORONTO, Canada – Polis na Toronto a confirma un tiroteo, caminda cu e atacante a tira contra di 14 persona. Den e tiroteo aki un persona, e atacante, a perde su bida.
E heridonan a wordo traslada pa un centro medico, entre cual tin un mucha cu ta permanece den estado critico. Autoridadnan ta informa cu e autor di e tiroteo a fayece.
E hechonan aki a tuma luga diadomingo den horanan di anochi na Greektown, den e zona di Riverdale (den e parti zuid di e ciudad). Segun medionan local, tabata tin un intercambio di tiro entre e agresor y e polis di Toronto.
Imagennan comparti pa testigonan riba rednan social ta mustra e momento cu e sospechoso ta cuminsa tira den e entrada di un tienda.
Segun Toronto Sun, varios ambulance a wordo manda pa luga di sucedido, unda cu polis, brandweer y personanan den cercania tabata atende e victimanan cu tabata boca abao, cerca di un bar.
Testigonan a bisa di a skucha entre 15 pa 20 tiro. Al menos dos di e victimanan tabata dos persona femenino jong. Un di nan ta un mucha muhe di 9 aña cu a wordo tira den lomba.
E tiroteo di diadomingo anochi ta bin net algun dia despued di cu polis di Toronto a bin cu’n iniciativa anti violencia cu a pone 200 polis mas ariba caya durante e oranan di anochi. Esaki tabata un contesta pa e zomer violento caminda cu varios persona a wordo tira.
Fuente: https://torontosun.com