Un morto na London den incidente cerca di mosque

0

LONDON, Inglatera – Un persona a muri y dies a resulta herida, ocho di nan hospitalisa, den un aparente atake terorista cerca di e mosque di Finsbury Park, nort di London, unda cu un van a dal fielnan musulman, pasa di mey anochi, Polis Britanico a informa.
Polis Metropolitano di London (Met), a precisa cu dos persona a resulta cu heridanan leve y a wordo atendi na e luga di atake, cu a sosode den e caya Seven Sisters, cerca di e estadion di futbol di e club Ingles Arsenal. Aunke Polis a confirma un morto, e Conseho Musulman Britanico (MCB), a indica cu ta calcula cu entre tres y cuater fiel lo a fayece ora cu nan a wordo gedal pa un van ora cu nan a sali for di resamento for di e Centro di Bienestar Musulman, cerca di e mosque di Finsbury Park.
E prome minister Britanico, Theresa May a informa awe cu Polis ta trata e incidente aki como un posibel “atake terorista” y a indica cu awe e lo presidi e asina yama Comite di Emergencia Cobra, forma pa e principal ministernan y representantenan di e forsa di orden, pa aborda e atake cerca di e tempel.
Segun Met, un homber, cual identidad no a wordo facilita y cu parce tabata e conductor di e vehiculo, a wordo aresta pa e agentenan despues di a wordo wanta pa un multitud. E individuo aki, cu segun testigonan, lo a trata di un homber color cla, di constitucion fisico fuerte, a wordo hiba na un hospital como medida di precaucion y una bes cu el a sali, lo wordo traslada pa un warda di polis pa e wordo interoga, e fuente a agrega. Polis tambe a confirma cu e sospechoso lo wordo someti na un evaluacion psicologico mas dilanti. E incidente a sosode a sosode den careda di 12’or y 20 di arduga, despues cu e resamento di mey anochi a caba.
E lider di e oposicion laborista, Jeremy Corbyn, a manifesta awe, atrabes di e red social Twitter, su “conmocion” pa e atake aki y a indica cu lo solidarisa cu e comunidad afecta. “Mi tabata den contacto cu e mosquenan, polis y e ayuntamiendo di Islington (nort di London) relaciona cu e incidente aki. Mi pensamentonan ta cu e comunidad y e afectadonan pa e horibel incidente aki,” e politico di oposicion, a agrega, diputado pa Islington, e circunscripcion electoral na cual ta pertenece na e bario di Finsbury Park.
Di su parti, e alcalde di London, Sadiq Khan, a cualifica di e atake na e “balornan comparti di tolerancia, libertad y respecto” e incidente di e anochi anterior. Ademas, e alcalde a pidi na e Londinensenan, den un declaracion, pa nan mantene e calma y keda vigilante mientras cu e incidente aki ta clarea, cu Polis lo trata esaki como un posibel atentado terorista, e di cuater den Reino Uni den tres luna. “Mientras cu esaki parce ta un atake contra un comunidad en particular, como e teribel atakenan di Manchester, Westminster y e Brug di London, esaki ta tambe un atake contra tur nos balornan comparti di tolerancia, libertad y respet.”
MCB a cualifica awe di “violenta manifestatcion” di islamofobia e incidente di e anochi anterior cerca di e mosque. E secretario general di MCB, Harun Khan, a bisa medionan local cu e comunidad musulman tabata tin cu soporta den e ultimo siman y lunanan hopi manifestacion di islamofobia. Khan a solicita autoridadnan Britanico un refuerso urgente di e siguridad di e mosquenan di Reino Uni, dado cu e luna sagrado di Ramadan ta pa conclui y lo cuminsa e tradicional celebracion musulman di “eid”, di e fin di e yuna. “E comunidadnan musulman a pidi durante varios aña mas medida pa taha e aumento di e delitonan pa odio y mas medida mester wordo tuma awo pa afronta no solamente di e incidente aki, sino e importante y preocupante aumento di islamofobia,” e secretario general di MCB a subraya. “Hopi lo ta fada y tristo pa loke a pasa anochi,” el a agrega.
E teror Yihadista a expande na Gran Britania desde dia 22 di Maart, ora cu Khalid Massod, un Britanico di 52 aña, a causa seis morto y 49 herido tras di a dal cu un auto varios peaton riba e brug di London di Westminster. Dos luna despues, dia 22 di Mei, un terorista suicida a causa cu durante un concierto di e cantante Mericano, Ariana Grande den Manchester Arena, 22 morto y 59 herido.
E terorismo di origen islamista, a cuminsa su tritsto andadura na Gran Britania, dia 7 di Juli di 2005, ora cu cuater explosion den transportenan publico di London, a provoca 56 victima mortal.
Fuente: http://www.abc.es/